Бородулиха ауданында Жеңістің 80 жылдығына орай ұлттық спорт түрлерінен жарыстар өтті. Соғыс ардагерлері мен тыл еңбеккерлерінің рухына тағзым етіп, мәңгілік алауға гүл шоқтарын қойған соң аудан тұрғындары ауылдағы атшабарға жиналды.
Атшабар аумағында қазақы дәстүрмен ақшаңқан қазақ үйлер тігіліп, ұлттық тағамдармен дастарқан жайылды. Ұлттық құндылықтарды ұлықтауды мақсат еткен шарада апайтөс балуандар боз кілемде белдесіп, құрыш білекті жігіттер қол күресіп, күш сынасты.
«Тайың өсіп – тұлпар болсын, құнаның өсіп дүлдүл болсын, ұлың өсіп батыр болсын!» деп тілеген халқымыз үшін ат спортының жөні бөлек. Ұйымдастырылған бәйге жарысы жиналған барша жұрттың делебесін қоздырып, патша көңілін тасытты.
Тай бәйге 3 шақырымға шапса, арбаға жегілген аттар 4 шақырымды еңсерді. Жүйрік аттар 2,4 шақырымды желіп өтсе, Жорғалар 5 шақырым шапты. Құнан бәйге 6 шақырым, Топ бәйге 12 шақырым қашықтық бойынша ұйымдастырылды.
Жарысқа Абай облысының Абай, Жарма, Бесқарағай, Ақсуат, Мақаншы, Жаңасемей аудандары мен Шығыс Қазақстан облысының Күршім, Алтай, Тарбағатай аудандарының атбегілері сайлап әкелген сәйгүліктерін қосты. Жарыс жолына түскен тұлпарлар шабысымен жанкүйерлердің көзайымына айналды.
Жарысты ұйымдастырушылардың айтуынша, басты мақсат – тарихқа көз жүгірте отырып, болашаққа зер салу, сонымен бірге, ұлттық спортты ұлықтау.
— Жеңіс күніне орай ауданымызда ұлттық спортты ұлықтауға арналған тамаша шара өтіп жатыр. Тарихқа көз жүгіртіп, бейбітшіліктің қадірін ұғынып, оны келер ұрпаққа түсіндіру – парызымыз. «Жігітте де жігіт бар, азаматы бір бөлек, Жылқыда да жылқы бар – қазанаты бір бөлек» демекші, бүгін балуандар белдесіп, сәйгүліктер жарыс жолына шықты. Бейбіт күнде мерекелік шаралар ұйымдастырылуда. Ең бастысы, еліміз аман, ел іргесі берік болсын!- деді Бородулиха ауданының мәдениет, тілдерді дамыту, дене шынықтыру және спорт бөлімінің басшысы Ернат Мотышев.
Шара соңында жеңімпаздар қаржылай сыйлықтармен марапатталды.
А.ЖАҚЫП,
«Жаңа уақыт»
