Жақында Астанада Ұлттық спорт түрлерінен VI фестивальдің ашылу салтанаты өтті. Елорда іргесіндегі «Қазанат» атшабарында басталған додаға еліміздің барлық өңірінен 17 облыс пен 7 қаладан келген 1 362 спортшы 11 спорт түрі бойынша сайысқа түсті.
Іс-шараның ашылуында Парламент Мәжілісінің спикері, AMANAT партиясының төрағасы Ерлан Қошанов өз тілегін білдірді.
«Төл мәдениетімізді дәріптеп, ұлттық спортты дамыту әрдайым Мемлекет басшысы Қасым-Жомарт Кемелұлы Тоқаевтың айрықша назарында. Оның ұрпақ тәрбиесіндегі маңызы туралы Президентіміз жақында Түркістанда өткен Ұлттық құрылтайда айтқан еді. Ұлттық спорт түрлері – бұл біздің тарихымыздың және қазақ халқының өзіндік ерекшелігінің айнасы. Оны дамыта отырып, рухани мұрамызды болашақ ұрпақтың игілігі үшін сақтап қаламыз», – деді Мәжіліс төрағасы.
Ұлттық спорт фестивалі 2003 жылдан бері дәстүрлі түрде өткізіліп келеді.
Төрт жылда бір өтетін ұлттық спорт додасында өңірлер асық ату, аударыспақ, бәйге, дәстүрлі садақ ату, жамбы ату, жекпе-жек, көкпар, қазақ күресі, құсбегілік, теңге ілу, тоғызқұмалақ сынды спорт түрлерінен бақ сынады.
Қазақ күресі – Қазақстандағы айрықша спорт түрі десек, қателеспеспіз. Бүгінгі таңда еліміздің барлық аймағында қазақ күресі федерациялары жұмыс істейді. Осы салада мыңнан астам жаттықтырушы еңбек етуде. Еліміз бойынша қазақ күресімен тұрақты айналысатындар саны 97 мыңнан асып түсті. Міне, сондықтан да қазақ күресін айрықша спорт түрі деп айтуға толық негіз бар.
Көшпенділердің мәдениеті неше мыңжылдықты құраса, күрестің де тарихы сонша мыңжылдыққа негізделген. Тарихшылардың айтуына қарағанда, ұлттық күрес біздің заманымызға дейінгі V – IV ғасырларда қалыптасқан. Уақыт өте келе, күрес те өзгеріске түсіп отырған.
Біздің ауданда қазақ күресі жақсы дамып келеді. Бұған әрине, осы салада еңбек етіп, жас ұрпақты баулып, оларға жол көрсетіп, шыңдап, тәрбиелеп жүрген жаттықтырушылар зор үлес қосуда.
Қазақ күресінен Абай облысының балуандары жақсы нәтиже көрсетіп, жүлделі орындарға ие болды. Солардың қатарыңда біздің жерлесіміз Санжар Ақылбеков 90 келі салмақ дәрежесінде екінші жүлделі орынға ие болды. Санжар Ақылбеков 6-сыныптан бастап Мұсылманбек Қажымұқанұлының жаттықтыруымен алғаш рет спорт табалдырығын аттаған. Әлихан Бөкейхан атындағы қазақ орта мектебін тәмамдап, заң мамандығы бойынша оқуға түскен. Қазіргі кезде қазақ күресінен Абай облысы құрамасының қатарында жүр. Талмай еңбектенудің арқасында Санжар көп биікті бағындырып, талай жарыстардың жеңімпазы атанған. Жас Барыс турнирінде жүлделі бірінші орынға ие болды. Кіші жасөспірімдер арасында ҚР чемпионы, жастар арасында ҚР чемпионы, ересектер арасында ҚР чемпионы аттанған. Бұған дейін де жарқын жеңістерімен қуантып келген жас балуан бұл жолы да діттеген межеден көріне білді.
Алқалы топтан абыроймен оралған Санжарға алдағы жарыстарда да сәттілік тілейміз.
Ербол Темирбулатов
