Ұстаз – қашанда қадірлі, қасиетті жан. Данышпан да, қарапайым еңбек адамы да ұстаз алдынан өтеді. Ғалым да, шахтёр де ұстазға бас иеді.
Бородулиха ауданындағы ұлағатты ұстаздардың бірі, білікті ұстаз, білгір басшы, Камышенка орта мектебінің директоры Гүлжан Бақтыбаеваның есімі де ұлағаты жандар қатарында аталады.
Гүлжан Мамашқызы тәрбиенің негізгі алтын діңгегі — ұлттық тәрбие тағылымын дәріптеп жүр. Сонымен бірге, ол – оқушылар мен ұстаздардың білімі мен біліктілігіне ғана назар аударып қоймай, олардың жүріс-тұрысы мен киім-киісіне де мән беріп, тәртіпті талап ететін талапшыл басшы.
Басшылығынан бөлек, Гүлжан Мамашқызы математика пәнінің мұғалімі. Білім алған дарынды шәкірттері аудандық, облыстық және республикалық байлауларға қатысып жүлделі орындар иеленген.
Өз пәнін жетік меңгерген педагог үнемі ізденіс үстінде. Жүйелі түрде біліктілігін арттырып, аудандық және облыстық, республикалық байқаулар мен семинарларға қатысады. 2019 жылы «Жаңартылған білім беру мазмұны аясындағы көшбасшылық және менеджмент» тақырыбында директорларға арналған облыстық оқыту семинарында білім беру басқармасының алғыс хатымен марапатталды. Сонымен бірге, білім беру саласын өркендету жолында адал қызмет етіп, жас ұрпақты оқыту мен тәрбиелеудегі ерен еңбегі, қоғамдық жұмыстарға белсене араласқаны үшін, Ыбырай Алтынсарин атындағы Республикалық білім қызметкерлерінің Ассосациясының төрағасының алғыс хатын алды. Мәдениетті дамытуға және өскелең ұрпақты тәрбиелеуге қосқан үлесі үшін 2017 жылы Д.Қонаев атындағы Ғылым академиясының орденімен, Қазақстан Республикасының өзін-өзі басқаруды және мемлекеттік жергілікті өзін-өзі басқаруды дамытуға қосқан үлесі үшін «Қазақстан Мәслихатының 20 жылдығы» мерейтойлық медалімен марапатталды.
Білім беру ұйымы басшыларының «Табысты менеджер – 2017» I Республикалық байқауының «Шағын жинақты мектептің табысты менеджері» номинациясы бойынша, II дәрежелі дипломымен марапатталды.
Сондай-ақ іскер басшының арқасында Камышенка орта мектебі «ҚР білім беру қызметкерлерінің бірлестігі» және Астана қаласы «Халықаралық Ғылым Академиясы Эвсландық инженерлік және педагогика» қоғамдық қоры төрағысының «Білім беру көшбасшысы – 2017» атты номинациясының сертификатымен марапатталды.
Саналы ғұмырын білім саласына арнаған ардақты жан көп жылғы еңбегі және білім беру жүйесін дамыту мен өскелең ұрпақты тәрбилеуге қосқан үлесі, жеткен жетістіктері үшін министрдің алғыс хатымен, Абай облыстық білім басқармасы басшысының алғыс хатымен марапатталды.
Дана халқымыз «Жақсының жақсылығын айт, нұры тасысын» деген ғой. «Жақсының тамыры тереңде, оны ешкім шаба алмас, көлеңкесі көктен, нұрын шашар еліне» деген асыл сөз Гүлжан Мамашқызына арналғандай. Біздің басшымыз көпшіліктің құрметіне бөленген жан. Бұл менің пікірім емес, бүкіл ұжымның, ата-аналардың пікірі.
Гүлжан Бақтыбаева Бородулиха аудандық ардагер ұстаздар кеңесінің төрайымы, білікті басшы, ұлағатты ұстаз ғана емес, отбасында асыл ана, үлгілі әже, сүйікті жар.
«Жақсы адам ғана жақсы басшы бола алады» демекші, білікті басшы, шығармашыл тұлға, ұжым мақтанышы. Сондықтан, білім сапасының артуына өз үлесін қосып, талай жыл талмай-қажымай еңбек етіп келе жатқан ардақты жан өз тұғырынан түспей, әлде де ұжымды жетістікке жетелейтініне сенім зор.
Соның мысалы ретінде, әлеуметтік желіні де бағындыра біледі. Facebook желісінде «Ғажайып ұстаздар» парақшасын жүргізіп, «Ардагер ұстаздар» парақшасын жүргізу арқылы жас ұстаздарға кеңес беріп жүргендігі өз алдына.
Осы арнау – тілегімізді, жүрек жарды лебізімізді арнай отырып, Сізге жұлдызыңыз жоғары, еңбегіңіз бағалы, мерейіңіз үстем болсын дейміз. Мықты денсаулық, мәнді де, мағыналы ғұмыр, әлі де мол жетістіктер, бақ-береке тілейміз!
Ғалия Жұмәділова,
Камышенка орта мектебінің
Кәсіподақ ұйымының төрайымы,
бастауыш сынып мұғалімі