Бородулиха ауданының әкімі Айдар Ибраев, орынбасарлары, бөлім басшылары, ауылдық және кенттік округ әкімдері, сондай-ақ аудандық мекеме басшыларының қатысуымен аппараттық кеңес өткізді. Кеңес барысында жүйелі көзқарас пен тұрақты бақылауды қажет ететін бірқатар өзекті мәселелер қаралды.
Кеңес барысында жергілікті халықты жұмыспен қамту басты басымдықтардың бірі ретінде атап өтілді.
Бүгінгі таңда аудан аумағында Жұмыспен қамту өңірлік картасы аясында 853 жұмыс орнын құруды көздейтін кешенді іс-шаралар жүзеге асырылуда. Мәселен, мамыр айының соңындағы жағдай бойынша аудан көлемінде жалпы саны 343 жұмыс орны ашылған.
Кеңес барысында сонымен қатар, алдағы шомылу маусымына дайындық мәселесіне де ерекше назар аударылды. Өткен жылдың көрсеткіштеріне сүйенсек, судағы жазатайым оқиғалардың басым бөлігі дәл осы кезеңде тіркелген екен.
Қазіргі таңда барлық демалыс орындары мен су айдындарына тексеру жүргізілді. Объектілер дайындық жұмыстарын толық аяқтамағандықтан, әзірге шомылуға тыйым салынған. Алдағы уақытта полиция және еріктілермен бірлескен рейдтер ұйымдастырылып, бұқаралық ақпарат құралдарында және қоғамдық орындарда судағы қауіпсіздік ережелері жөнінде ақпараттық материалдар жарияланатын болады. Басты мақсат — тұрғындардың амандығы мен қауіпсіздігін қамтамасыз ету.
Айкөркем МАҚЫШ,
«Жаңа уақыт»