Өткен жұмада тіл саясатын дамытудың 2023-2029 жылдарға арналған тұжырымдамасын жүзеге асыру аясында Бородулиха ауданында «Тіл – ұлттың жаны» атты дөңгелек үстел өтті.
Іс-шараға Абай облысының мәдениет, тілдерді дамыту және архив ісі басқармасының, Облыстың лингвистикалық орталығының, Әлихан Бөкейхан университетінің, Курчатов қаласының, Бесқарағай, Бородулиха, Көкпекті аудандарының тілдерді оқыту орталықтарының мамандары мен Бородулиха ауданының мемлекеттік және басқа тілдерді оқыту орталығының тыңдаушылары қатысты.
Дөңгелек үстел отырысы Абай облысының мәдениет, тілдерді дамыту және архив ісі басқармасының Тілдерді дамыту және ономастика бөлімінің басшысы Айгерім Байжұманованың кіріспе сөзімен ашылды.
Қазақ тілінің қолданылу аясын кеңейту, мәртебесі мен маңызын кеңінен насихаттау, өзге ұлт өкілдері арасында қазақ тілін білу деңгейін көтеру және оқып-үйренуге деген ықыласы мен қызығушылығын арттыру, қазақ халқының, өз ұлтының салт–дәстүрін, тарихын құрметтеуге тәрбиелеу мақсатында ұйымдастырылған іс-шарада сөз алған спикерлер тіл беделі, мемлекеттік тіл мәртебесі және қазақ тілін оқытудың маңызы жайындағы баяндамаларын оқып, ой-пікірлерін ортаға салды.
Әлихан Бөкейхан университетінің филология кафедрасының меңгерушісі, филология ғылымдарының кандидаты Құралай Төлебаева «Мемлекеттік тіл – ұлт тірегі» тақырыбындағы баяндамасында қазақ тілінің бүгінгі жағдайы, қадір-қасиеті, маңызы төңірегінде келелі ой өрбітті. Абай облысының лингвистикалық орталығының әдіскері, Халықаралық айтыскер ақындар мен жыршы-термешілер одағының Абай облысы филиалының төрағасы Дәулет Сметов тіл беделі, ұлт мәселесіне байланысты сөз қозғай келе, мемлекеттік тілдің мәртебесін көтеруге атсалысу үлкен-кішінің ортақ парызы екендігін атап өтті. Бородулиха ауданының мемлекеттік және басқа тілдерді оқыту орталығының оқытушысы Виктория Мокроусова мен Новопокровка ауылдық округі филиалының оқытушысы Әсел Ықыласова тіл мәртебесін арттыру, өзге ұлт өкілдеріне тіл үйрету мәселелеріне тоқталып, екі тілді білу сол елдің мәдениетін түсінуге ықпал етеді деген пікірін жеткізді.
Дөңгелек үстелге қатысушылар өзге тілді қалай меңгергендері туралы әңгімелеп, өз тәжірибелерін бөлісті.
Айкөркем МАҚЫШ,
«Жаңа уақыт» 
