Бірлік, татулық және ынтымақ – елдігіміздің мызғымас тұғыры һәм мемлекетіміздің басты байлығы. Қазақ халқы қиын-қыстау кезеңдерде тағдырдың тәлкегімен босып келген түрлі ұлт пен ұлыстың өкілдерін бауырына басты. Бүгінде мемлекетімізде 130-дан астам этнос тату-тәтті тұрып жатыр. Көп ұлтты Бородулиха ауданында этносаралық достық, ынтымақ пен бірлік дәріптелді.
Ауданда 43 ұлт пен ұлыстың өкілі тату-тәтті ғұмыр кешіп жатыр. Қазақстан халқы Ассамблеясының 30 жылдығы аясында орталық алаңда ұйымдастырылған мерекелік шарада әр ұлт пен ұлыс өкілдері өздерінің аулаларын құрып, ұлттық киімдерін, тағамдары мен салт-дәстүрін көрсетті.
Шарада Бородулиха ауданының әкімі Айдар Ибраев тұрғындарды құттықтап, ақжарма тілегін жеткізді.
— Бұл мереке – еліміздегі түрлі ұлт өкілдерінің бейбітшілік пен келісімде өмір сүріп жатқандығының айқын көрінісі. Бірлік – Тәуелсіздігіміздің, тұрақтылығымыздың және еліміздің алға басуының берік негізі. Бізді біріктіретін басты күш – өзара сыйластық, мәдениет пен дәстүрге деген құрмет,- деді Айдар Маратұлы.
Мерекеде этномәдени бірлестіктердің белсенділері аудан әкімінің алғыс хатымен марапатталды.
Аудандық мәдениет үйінің әртістері, вокалдық және би топтары, сондай-ақ Достық Үйінің өкілдері өнер көрсетіп, мереке көрігін қыздыра түсті. Әртүрлі ұлт өкілдері халық өз өнерін паш етіп, мәдениетімен таныстырды.
Ә.Жақып,
«Жаңа уақыт»