Ауданда Қарттар күніне арналған айлық бастау алды. Ардагерлерге құрмет көрсету, олардың еңбегін бағалау және жастарға өнеге ету мақсатында түрлі іс-шаралар ұйымдастырылуда. Солардың бірі – Әлихан Бөкейхан атындағы қазақ орта мектебінде өткен шахмат турнирі. Бұл жарысты аудандық ардагерлер кеңесі ұйымдастырды.
Салтанатты іс-шарада аудан әкімінің орынбасары Қайрат Сапоров, аудандық ардагерлер кеңесінің төрағасы Жұмағали Рахимов, «AMANAT» партиясы аудандық филиалының атқарушы хатшысы Эльдар Конорбаев және мемлекеттік қызмет ардагері Сергей Лазурин сөз сөйлеп, қатысушыларға жылы лебіздерін жеткізді. Олар ардагерлердің еңбегіне алғыс айтып, осындай шаралардың жастарға тәлім-тәрбие берудегі маңыздылығына тоқталды.
Шахмат тақталарына еңбек ардагерлері мен мектеп оқушылары отырды. Қарттар мен жастардың шахматтағы тартысты ойыны қызықты да тағылымды сәттерге толы болды. Ал ойынға қатыспаған ардагерлермен жоғары сынып оқушылары әңгімелесіп, олардың өмір жолы мен мамандықтары туралы сұрақтар қойды. Ардагерлер өз кезегінде жас буынға құнды кеңестерін беріп, өмірлік тәжірибелерімен бөлісті.
Турнир қорытындысында жеңімпаздар медальдар мен сыйлықтарға ие болды. Сондай-ақ, ардагерлер кеңесінің белсенді мүшелері аудандық ардагерлер кеңесі төрағасының атынан Алғыс хаттармен марапатталды.
Мұндай кездесулер жас буын мен ардагерлер арасындағы алтын көпір іспетті. Ардагерлер жастар тарапынан құрмет пен қамқорлықты сезінсе, ал жас ұрпақ үлкендердің даналығы мен өмірлік тәлімін бойына сіңіріп, болашаққа бағдар алады.
Бұл турнир ардагерлерге құрмет көрсетіп қана қоймай, шахмат сияқты зияткерлік ойын арқылы жастардың ой-өрісін дамытуға да ықпал етті. Осындай тағылымы мол іс-шаралар алдағы уақытта да жалғасын табатынына сенім мол.
Ш.ДОСКЕЕВА,
«Жаңа уақыт»
