Бородулиха ауданында 8 наурыз – Халықаралық әйелдер күніне арналған салтанатты мерекелік іс-шара ұйымдастырылды Іс-шараға ауданның мектеп мұғалімдері, дәрігерлер, мемлекеттік және әлеуметтік сала қызметкерлері, сондай-ақ белсенді аудан тұрғындары қатысты.
Аудан әкімінің міндетін атқарушы Т.Б. Мұратов құттықтау сөзінде аналар мен аруларға шын жүректен алғыс айтып, жылы лебізін білдірді. Ол өз құттықтауында:
— «Бұл күн – сұлулықтың, мейірімнің, жылулықтың мерекесі. Сіздер әр шаңырақтың шуағы, әр отбасының тірегі, өмірдің көркісіздер.
Сіздер тек отбасыңыздың берекесін келтіріп қана қоймай, ел дамуына да өз үлестеріңізді қосып келесіздер. Қай салада жүрсеңіздер де, табандылық пен жауапкершіліктің, парасат пен төзімнің үлгісін көрсетіп жүрсіздер.
Дендеріңізге саулық, отбасыларыңызға амандық, барлық бастамаларыңызға сәттілік тілеймін!» – деді.
Шара барысында бірқатар аудан тұрғындары әкімнің алғыс хатымен марапатталды. Оларға кәсіби шеберлігі, адал еңбегі, қоғамға қосқан үлесі үшін ризашылық білдірілді. Марапатқа ие болғандар қатарында білім беру, медицина, әлеуметтік қызмет, мемлекеттік және қоғамдық салада ұзақ жылдар бойы адал еңбек етіп келе жатқан кәсіби мамандар бар. Бұл марапаттар қатысушылардың қажырлы еңбегі мен қоғамдық өмірге белсенді қатысуын мойындаудың айқын дәлелі болды.
Марапат алғандардың арасында Зубаир ауылдық округінің фельдшері Айсара Бағдатова, Петропавловка ауылдық округі аппаратының техникалық қызметкері Сауле Бисимбинова, Әлихан Бөкейхан атындағы мектептің вахтері Камила Бекбулатова, Новодворовский және Дмитриевка ауылдарындағы зейнеткер азаматтар, сонымен қатар ауданның медицина, білім беру және әлеуметтік мекемелерінің көптеген қызметкерлері бар.
Марапатталғандар өз кәсібіне адалдықпен қарап, ұжымдық жұмысқа белсенді қатысып, қоғамдық өмірге үлес қосып жүргендері үшін алғысқа лайық деп танылды. Олардың кәсіби шеберлігі, ұйымшылдығы және табандылығы аудан өміріне өз үлесін қосып, жастар үшін үлгі болып отыр.
Мерекелік концерт бағдарламасы көрермендерді рухтандырып, көңіл-күйін көтерді. Әндер, би нөмірлері және шығармашылық қойылымдар әр қатысушының жүрегіне әсер етті. Сахнада «Жігіттер» тобы, Жандос Қажыбеков, Андрей Лягин, Арнұр Нұрлан мен Мадина Таласбекова өнер көрсетті. Көрермендерге гүл шоқтары табыс етіліп, мерекелік атмосфера сезілді.
Мереке аналар мен аруларға арналған жылы лебіздермен, музыкалық және көркем шығарылымдармен есте қалды. Бородулихадағы бұл салтанатты шара әйелдердің қоғамдағы орны мен олардың отбасының тірегі екенін тағы бір мәрте айқындап, мерекенің мән-маңызын жеткізді.
Шайза АСАНҚЫЗЫ,
«Жаңа уақыт»
