Бородулиха ауданының әкімі Айдар Ибраев Президент Қасым-Жомарт Тоқаевтың Жолдауына сәйкес бірқатар маңызды бағыттарға тоқталып, соның ішінде жаңа инвестициялық циклды бастаудың негізгі басымдықтардың бірі екенін атап өтті.
Президент жолдауында инвестицияларды тартпаса, жаңа технологияларды енгізу, жұмыс орындарын ашу және әлеуметтік инфрақұрылымды дамыту мүмкін емес екенін, қазіргі инвестициялық саясаттың уақыт талабына жауап бермейтінін, себебі ресурстардың көпшілігі шикізат саласына бағытталатынын айтты.
Бұл мәселелер біздің ауданымызға да қатысты. Біз қандай салаларға инвестициялар қажет екенін анықтап, нақты нәтижелерге қол жеткізуіміз керек. Жаңа өндірістер ашу, жұмыс орындарын құру және халықтың табысын арттыру – басты мақсатымыз, — деді аудан әкімі.
Жолдауда қазіргі инвестициялық саясаттың шикізат саласына тым көп тәуелді екені сынға алынды. Сондықтан өңдеуші өнеркәсіп, жоғары технологиялар мен инновациялар басты бағытқа айналуы тиіс. Осыған орай инвесторларға жеңілдіктер ұсынып, жеке бастамаларды қолдауды күшейту қажеттігі де баса айтылды.
Айдар Ибраев бұл мәселелердің аудан үшін де өзекті екенін атап өтіп, Бородулихада инвестиция тартылатын салаларды нақты айқындап, жаңа өндірістер ашу, жұмыс орындарын құру және халықтың табысын арттыруды басты мақсат ретінде белгіледі.
Аудан әкімі ауыл шаруашылығы Бородулиха үшін аса маңызды сала екенін атап өтті. Президент аграрлық секторды экономикалық өсімнің негізгі драйверіне айналдыруды тапсырды. Осыған сәйкес, ауданда ауыл шаруашылығы саласын жаңғыртып, цифрлық технологиялар мен жаңа әдістерді енгізу арқылы өнімділік пен сапаны арттыру көзделуде. Бұл бағыт шығындарды азайтып қана қоймай, процестердің ашықтығын қамтамасыз етуге, өнім сапасын бақылауға мүмкіндік береді. Сонымен бірге, ауыл шаруашылығында терең өңдеуді дамыту да маңызды міндет ретінде айқындалды. Аудан тек астық өсірумен шектелмей, қосымша құнды өнімдер өндіру арқылы ішкі нарық пен экспорттық әлеуетті арттыруы қажет.
Жолдауда айтылған тағы бір басымдық – цифрлық технологияларды дамыту. Мемлекет басшысы цифрлық активтер жүйесін қалыптастыруды, мемлекеттік цифрлық активтер қоры мен крипто-резервті құруды тапсырды. Сонымен қатар онлайн алаяқтыққа қарсы іс-шаралар қолға алынғанымен, бұл бағытта әлі де көп жұмыс атқару қажет екені айтылды. Айдар Ибраевтың пікірінше, аудан деңгейінде халықты ақпараттандыру, банктер мен оқу орындарын тарта отырып, қауіпсіздік мәдениетін қалыптастыру – басты міндеттердің бірі.
Президенттің тапсырмасына сәйкес, тұрғын үй-коммуналдық және су инфрақұрылымын жаңғыртуға да ерекше назар аударылды. Аудан әкімі инженерлік желілердің тозуын төмендету, басқару әдістерін жетілдіру, тарифтердің әділ либерализациясын қамтамасыз ету қажеттігін айтты. Сонымен бірге су ресурстарын үнемді пайдалану мәселесі де назардан тыс қалған жоқ. Су үнемдеу мәдениетін қалыптастыру, жастар арасында экологиялық білім беру жұмыстарын күшейту және жаңа технологияларды енгізу – ауданның алдағы жоспарларының қатарында.
«Тек күш-жігерді біріктіріп, бастамашылдық пен жауапкершілік танытқанда ғана Бородулиха ауданының тұрақты дамуын қамтамасыз етуге болады. Сонда аудан әрбір тұрғыны үшін инновациялар, жайлылық пен жаңа мүмкіндіктер мекеніне айналады», – деп атап өтті аудан әкімі.
Бородулиха ауданы әкімінің
баспасөз қызметі