Өрт сөндіру бекеттері ауылдық округтер мен жалпы аудан тұрғындары үшін техногендік және табиғи сипаттағы төтенше жағдайларда жедел әрекет етіп, тұрғындар қауіпсіздігін қамтамасыз етуге мүмкіндік береді. Өткен аптада Бородулиха ауданына Абай облысы Төтенше жағдайлар департаментінің басшысы Манарбек Шапағатов жұмыс сапарымен келді.
Сапар барысында аудан әкімі Айдар Ибраев, аудандық Төтенше жағдайлар бөлімінің басшысы Ержан Сүлейменов, Новопокровка ауылдық округінің әкімімен бірге Новопокровка ауылындағы өрт сөндіру бекеті ғимаратының жай-күйімен танысты. Бұл өрт сөндіру бекеті 2024 жылы ашылған болатын. Кеңес заманында іргетасы қаланған ғимарат жөндеуді қажет етеді. Ғимарат шатырын ауыстырып, жылу жүйесін жаңғыртып, ішкі жөндеу жұмыстарын жүргізу кезек күттірмейтін мәселе болып тұр. Бүгінгі күні бекетте бір өрт сөндіру көлігі бар, екі өрт сөндіруші қызмет етеді. Бекет ашылған сәттен бастап екі өрт оқиғасы орын алып, мамандардың жедел әрекетінің арқасында тілсіз жау дер кезінде ауыздықталыпты.
Бекет жұмысымен, ғимарат жағдайымен танысқан Манарбек Қайыргелдіұлы ірі ауылдардағы өрт сөндіру қызметін қалпына келтіру Төтенше жағдайлар министрлігі белгілеген бірінші кезектегі міндет екенін атап өтті. Бекетті жөндеу жұмыстары бойынша жоспар талқыланып, күрделі жөндеу үшін жобалық-сметалық құжаттама әзірлейтін болды.
Ай-Көркем МАҚЫШ,
«Жаңа уақыт» 
