Ширек ғасыр Шығыс Қазақстан облысының құрамында болған өңіріміз ұлы ақын атындағы облыс болып қайта құрылғанына 2 жыл болды. Өткен аптада Семей қаласында Абай облысының әлеуметтік-экономикалық даму мәселелері жөнінде кеңейтілген кеңес өтті. Жиында облыс әкімі Нұрлан Ұранхаев, орынбасарлары Димитрий Гариков, Әділбек Мұсабаев, қаржы басқармасының басшысы Әділет Қожанбаев, Абай облысы мәслихатының төрағасы Қуаныш Сүлейменов, TASGROUP компаниялар тобының басқарушысы Дулат Тастекеев және Курчатов қаласының әкімі Болат Әбдірәлиев баяндама жасады.
Мемлекет басшысы Қасым-Жомарт Кемелұлы Тоқаевтың тарихи шешімімен Абай облысының құрылғанына екі жыл толуына орай өткен кеңейтілген кеңеске жиналғандардың қарасы қалың болды. Алдымен облыс әкімі Нұрлан Ұранхаев өңірдің осы екі жыл ішіндегі әлеуметтік-экономикалық дамуы туралы ауқымды баяндама жасады.
— Баршаңызға белгілі, былтыр дәл осындай форматта өздеріңізбен кездесіп, өңірдің әлеуметтік-экономикалық даму мәселелері жөнінде үлкен жиын өткізген болатынбыз. Сол кезде бұл жиын дәстүрлі түрде жыл сайын өтетінін айтқанмын. Міне, бүгін, араға жыл салып, екінші мәрте облыстың барлық деңгейдегі әкімдерінің, мәслихат депутаттарының, құқық-қорғау органдары басшыларының, қоғам өкілдерінің және бұқаралық ақпарат құралдары өкілдерінің қатысуымен кеңейтілген форматтағы кездесуде қайта жүздесіп отырмыз. Мемлекет басшысы Қасым-Жомарт Кемелұлы Тоқаевтың тарихи шешімімен құрылған Абай облысына ертең тура екі жыл толады. Сондықтан өткенге есеп беріп, алға қойған мақсаттарымызды тағы бір мәрте айқындап, жоспарларымызды нақтылау қажет. Қысқа уақыт ішінде атқарылған жұмыс аз емес. Облыстың әлеуметтік-экономикалық дамуының барлық көрсеткіштері бойынша оң нәтиже бар. Соның барлығы сіздермен бірлесіп атқарған жұмыстың нәтижесі деп білемін,- деді облыс әкімі Н.Ұранхаев.
Облыста тұрғын үй құрылысы, жол жөндеу, инфрақұрылымды жаңарту, әлеуметтік нысандар салу сынды маңызды салалар бойынша жұмыстар жалғасуда. Облысты дамытудың кешенді жоспары қабылданды. Жаңадан Мақаншы және Жаңасемей аудандары құрылды.
— Біздің басты мақсатымыз — Президент реформаларын сапалы жүзеге асырып, Үкіметтің алға қойған тапсырмаларын орындап, халықтың тұрмыс сапасын жақсарту және табысын көбейту. Жиналыстың осындай форматта өтуі кездейсоқтық емес, себебі қарастырылатын мәселелер осы жерде қатысып отырған биліктің барлық тармақтары өкілдерінің, қоғамдық институттары және Абай облысымен байланысы бар әрбір азаматтың тиімді және бірлескен жұмысын талап етеді,- деді облыс әкімі Н.Ұранхаев.
Кеңес барысында облыстық қаржы басқармасының басшысы Әділет Қожанбаев, облыс әкімінің орынбасарлары Димитрий Гариков және Әділбек Мұсабаев өздері жетекшілік ететін салалары бойынша өткен жылдың қорытындылары мен қысқа және орта мерзімді кезеңдерге арналған жоспарлар туралы толығырақ баяндады.
— Құрметті жиналысқа қатысушылар! Жүргізіліп жатқан жоспарлы саяси реформалар аясында басқарушылық шешімдер қабылдауда жергілікті өзін-өзі басқарудың рөлі ерекше. Бүгінгі кеңеске біз барлық деңгейдегі әкімдерді ғана емес, мәслихаттардың барлық депутаттарын, қоғамдық кеңестердің мүшелерін де шақырғанымыз кездейсоқтық емес. Жергілікті жерлерде сіздердің барлықтарыңыз ортақ мақсат жолында халықтың өзекті мәселелерін шешу үшін сындарлы арнада сапалы жұмыс істеулеріңіз қажет. Мемлекет басшысының Ұлттық құрылтайда айтылған бастамаларын іске асыру аясында қоғамды нығайту және бір арнаға шоғырландырудағы халық пен мемлекеттік басқару органдарының өзара іс-қимылы аса маңызды фактор екені сөзсіз,- деген облыс әкімі Нұрлан Тельманұлы келесі сөз кезегін облыстық мәслихаттың төрағасы Қуаныш Сүлейменовке берді.
— Осыдан 2 жыл бұрын, 8 маусымда, Абай облысы қайта құрылған еді. Облыс бюджеті 2022 жылы 260,3 млрд теңге болса, биыл 447,4 млрд теңгені құрайды. Бұл 2022 жылмен салыстырғанда 187,1 млрд теңгеге артық. Яғни 2 жыл ішінде облыс бюджеті 72 пайызға өсті. Абай облысы мәслихатының VIIІ шақырылым депутаттары осы уақытқа дейін 15 сессия отырысын өткізді, оның ішінде 4-еуі — кезекті және 11-і — кезектен тыс отырыстар. Екі көшпелі сессия Жарма және Аягөз аудандарында өтті,- деді облыстық мәслихат төрағасы Қуаныш Сүлейменов.
Өңірдің дамуы мемлекеттік органдар мен қоғамдық институттардың жұмысымен ғана шектелмейтіні анық. Жалпы, халықтың тұрмыс сапасын жақсартуда, инфрақұрылым мен жұмыс орындарын құруда бизнестің рөлі аса маңызды. Осы орайда ауылдық елді мекендерді қолдау, сондай-ақ өңірдің жалпы дамуы мәселесіндегі мемлекет пен бизнестің өзара байланыс тетіктері туралы TASGROUP компаниялар тобының басқарушысы және иесі Дулат Тастекеев баяндама жасады.
Биыл ел Президенті өзінің Қазақстан халқына Жолдауында бірқатар әкімшілік және саяси реформаларды ұсынған болатын. Соның бірі қала және аудан деңгейіндегі әкімдерді тікелей дауыс беру арқылы сайлау. Бұл – демократиялық, әлеуметтік, құқықтық бағытты таңдап алған еліміз үшін дамудың жаңа кезеңі екені сөзсіз. Былтыр қараша айында тәуелсіз Қазақстанның тарихында алғаш рет пилоттық режимде еліміздің 45 өңірінде әкімдердің сайлауы өтті. Соның ішінде Абай облысы бойынша Курчатов қаласы мен Абай ауданының әкімдері сайланған болатын.
Кеңейтілген кеңесте сол пилоттық режимде сайланған әкімдердің бірі Курчатов қаласының әкімі Болат Әбдірәлиев өзінің сайлауалды бағдарламасының іске асу барысы және алға қойған жоспарлары туралы баяндама жасады.
Кеңейтілген кеңесті облыс әкімі Нұрлан Ұранхаев қорытындылады.
— Құрметті жиналысқа қатысушылар! Жалпы, атқарушы және өкілетті билік, қоғамдық кеңестер, басқарудың барлық деңгейлерінде өзара тығыз байланыста болуы қажет. Себебі әрбір сатыда өзіндік сипаты бар мәселелер өте көп. Сондықтан біздің өзара байланысымыздың тиімділігіне қарай, жұмысымыздың нәтижесі де оң болады деп санаймын. Мемлекет басшысының бастамасымен жүзеге асырылып жатқан «Таза Қазақстан» экологиялық акциясы өңірдің барлық аймақтарында сапалы орындалуы қажет. Біздің ортада экологиялық мәдениет қалыптасуы керек, тазалық — денсаулықтың кепілі, облыстың айнасы. Ел Президенті атап өткендей, «Шын мәнінде елімізді көгалдандыру, абаттандыру — үлкен мемлекеттік маңызы бар іс. Бұл бүгін шығып, ертең ұмытып кететін бір реттік науқан емес. Аталған жұмыс тұрақты түрде жүргізіледі. Туған жерімізді таза ұстауымыз керек. Бұл — жалпыұлттық мәселе». Сондықтан сіз бен біз болып осы бағыттағы бірлескен жұмысымызды жалғастыруымыз қажет. Осымен, бүгінгі күн тәртібіндегі барлық сұрақ қаралды. Жиналыс басында атап өткенімдей, біздің кездесудің осындай кеңейтілген форматы дәстүрлі түрде жыл сайын өткізілетін болады. Себебі атқарылған жұмысқа есеп беріп, алға қойған мақсаттарды анықтап, болашақ бағдарды анықтауымыз керек. Оған сіздердің қолдауларыңыз қажет! Елдің келешегі баршамызға ортақ! Ел іргесі аман, жұрт тыныш, болашағымыз баянды болсын! – деп түйіндеді сөзін облыс әкімі Нұрлан Ұранхаев.
Жадыра ТӨЛЕГЕНҚЫЗЫ