28 қарашада Абай облысының өңірлік коммуникациялар қызметінде Бородулиха ауданының әкімі Айдар Ибраев ауданның әлеуметтік-экономикалық дамуы және мемлекеттік бағдарламалардың орындалуы тақырыбындағы брифингке қатысты. Брифинг барысында өңір басшысы 2023 жылы атқарылған жұмыстар туралы ақпарат берді.
Бородулиха ауданында биыл жалпы ауданы 1500 шаршы метрді құрайтын қоспәтерлі 5 үйдің құрылысы аяқталып, 10 отбасы баспанамен қамтамасыз етілген. 10 отбасыға берілген үйлер 2023-2029 жылдарға арналған тұрғын үй-коммуналдық инфрақұрылымды дамыту тұжырымдамасы шеңберінде салынып, 115 млн. 209 мың теңгеге сатып алынған. Әйтсе де, аудан бойынша бүгінгі таңда 5 санат бойынша 486 адам тұрғын үй кезегінде тұр.
«Ауданда құрылыс жұмыстары жалғасуда. Бородулиха ауылындағы Абай, Борков және Қазақстан көшелерінде электрмен жабдықтау, көшені жарықтандыру, сондай-ақ, су құбырын тарту және кәріз жүйесін орнату жұмыстары жүргізіліп жатыр. Осы жылы 3184,8 м су құбыры тартылды, 2336 м кәріз жүйесі жасалды. Сондай-ақ, осы көшелерде электр, көше жарығын орнату бойынша жұмыстар аяқталды. Инженерлік-коммуникациялық инфрақұрылымды салуға барлығы 115 млн. 468 мың теңге жұмсалды», — деді Бородулиха ауданының әкімі.
Оның айтуынша, сумен жабдықтау нысандарын салу бойынша жұмыстар қарқынды жүргізіліп жатыр. Жаңашүлбі ауылының сумен жабдықтау желілерін қайта құру жұмыстары аяқталған. Желілердің ұзындығы 24,2 шақырымды құрайды. Сондай-ақ, Березовка подхозында кентішілік сумен жабдықтау желілерін және Петропавловка ауылында магистральдық желілерді салу жұмысы жүргізілуде.
«Биыл Березовкада ұзындығы 3,8 шақырым кентішілік желілер толық салынып, желтоқсан айында қолданысқа берілмек. Осыған байланысты 50 тұрғын үй таза ауыз сумен қамтылатын болады. Ал Петропавловка ауылында 5,2 шақырым су құбыры салынып, қуаты 10 кВт электр беру желілерін монтаждау жұмыстары аяқталуға жақын», — деді Айдар Ибраев.
Биыл Белағаш, Бородулиха ауылдық округтерінің ауылдарында жалпы сомасы 57 млн. 605 мың теңгеге спорт, шағын футбол алаңдары салынған. Бұдан бөлек, Бақы, Бородулиха, Зубаир, Жаңашүлбі, Новодворовка, Степной, Таврия ауылдық округтерінде 52 млн. 54 мың теңгеге 7 балалар алаңы орнатылған. Бородулиха ауылында 28 млн. 901 мың теңгеге хоккей корты салынып, саябаққа жөндеу жұмыстары жүргізіліп, ауған соғысы жауынгерлеріне арналған ескерткішке апаратын жол жасалған.
2023 жылғы 1 қыркүйектен бастап 1957 бастауыш сынып оқушысына тегін ыстық тамақ ұйымдастырылды, бұл мақсатқа бюджеттен 89 млн. 622 мың теңге бөлінген. Ауданда жобалық қуаты 7250 баланы құрайтын 32 жалпы білім беретін мектеп жұмыс істейді, оқушылар контингенті 5255-ді құрайды, оның 378-і мектепалды даярлық балалары.
«Ауданымыз бойынша 2023 жылы 6 мектепке ағымдағы жөндеу жұмыстары жүргізілді, олар: «Абай атындағы мектеп», «Сахновка негізгі орта мектебі», «Жезкент кентінің мектеп лицейі», «Боровлянка негізгі орта мектебі», «Краснояр орта мектебі», «Орловка негізгі мектебі». Мектептердің шатырларын, терезелерін жөндеу, ауыстыру жұмыстарына 73 млн. 780 мың теңге қаражат жұмсалды», — деп атап өтті аудан әкімі.
Өңірде жыл басынан бері автомобиль жолдарын жөндеу бағытында ауқымды жұмыстар атқарылған. Мәселен, 1 млрд. 61 мың теңгеге Буркотово ауылына кіреберіс 23 шақырым жол жөнделген.
«Жезкент кентінде Сахаров көшесінің бойындағы жүру бөлігі мен тратуарларды орташа жөндеу 820 метрге жүргізілді. 450 шаршы метр жаяу жүргінші жолына асфальт төселді. Михайличенково ауылында 3,2 шақырымды құрайтын 3 көшеге, Дмитриевка ауылындағы 2,4 шақырымды құрайтын 2 көшеге орташа жөндеу жұмыстары жүргізілді. Аудандық маңызы бар 337 шақырымды құрайтын автомобиль жолдарын күтіп ұстауға ауылдық округ әкімдіктеріне 95 млн. 457 мың теңге бөлініп, игерілді», — деді Айдар Ибраев.
«Ауыл — ел бесігі» жобасы аясында 2023 жылға 258 млн. 736 мың теңге көлемінде қаражат бөлініп, көше жолдары да қайта жөндеуден өткен. Елді мекендерде көше шамдарын орнату бойынша жұмыстар биыл да жалғасып, 8 ауылда 77 млн. 585 мың теңгеге 408 шам орнатылған.
Брифингтің соңында аудан әкімі облыстық бұқаралық ақпарат құралдары өкілдерінің сауалдарына жауап берді.
Сұлтан Ибрагимов