Жақында аудан әкімдігінің кіші залында Бородулиха ауданының әкімі Айдар Ибраевтың төрағалығымен аудан әкімдігінің отырысы өтті. Отырысқа аудан әкімнің орынбасарлары, ауылдық округтер мен кент әкімдері, ауданның дербес бөлімдерімен мекемелерінің басшылары қатысты.
Әкімдік отырысында Новопокровка ауылдық округінде дене шынықтыру мен спорттың даму жағдайы туралы мәдениет, тілдерді дамыту, дене шынықтыру және спорт бөлімінің басшысы Индира Бельская есеп берді.
Оның айтуынша, бұл ауылдық округте 2400 адам тұрады. 2023 жылғы 1 қыркүйектегі жағдай бойынша, Новопокровка ауылдық округінің спорт инфрақұрылымы 9 спорт нысанынан тұрады. Олар: 2 спорт зал, 1 тренажерлық зал, мектептердің жанында орналасқан 2 спорт алаңы, шағын футбол алаңы, футбол алаңы, хоккей корты.
— Биыл көктемде демалыс саябағында «Лина-Агро» ЖШС-нің демеушілігімен воркаут алаңы, шағын футбол алаңы, волейбол және баскетбол алаңдары орнатылды.
«2021 жылдың желтоқсан айында Новопокровка ауылында аудандағы шаруа қожалықтарының демеушілігімен салынған хоккей кортының салтанатты ашылуы өтті. Биыл «Исток-2» шаруа қожалығының басшысы Евгений Червяков округ спортшыларына 100 мың теңге тұратын спорттық киімдерді сыйға тартты. «Ауыл – Ел бесігі» бағдарламасы аясында 2025 жылға қарай Новопокровка ауылында спорт модулінің құрылысы қолға алынады, – деді бөлім басшысы.
Бұдан кейін Бородулиха ауданыныда мемлкеттік жастар саясатын іске асыру барысы туралы аудандық ішкі саясат бөлімінің басшысы Медет Жайдарбековтың баяндамасы тыңдалды.
— Бородулиха ауданында мемлекеттік жастар саясатын Бородулиха ауданының жастар ресурстық орталығы жүзеге асырады. Жастар ресурстық орталығы – жастардың бастамаларына ақпараттық, әдістемелік, консультациялық қолдау көрсету, жастар арасындағы жағдайды бақылауды және талдауды жүзеге асыратын заңды тұлға.
Барлық іс-шара Бородулиха ауданында жастар саясатын жүзеге асыру бойынша жұмыс жоспарына сәйкес жүргізілуде. Жастар ресурстық орталығының мамандары, сондай-ақ ауылдық округтер мен Жезкент кентінің әкімдіктеріндегі 18 маман мемлекеттік жастар саясатын барынша тиімді жүзеге асыру мақсатында Бородулиха ауданының мектептерімен, колледждерімен және жұмысшы жастарымен белсенді ынтымақтастық орнатқан.
«Сондай-ақ, жастар мен жасөспірімдер арасындағы құқық бұзушылықтың алдын алу мәселелері ерекше бақылауда. Жастар арасындағы қылмыс пен құқықбұзушылықтың жолын кесу мақсатында мектептің учаскелік полиция инспекторлары мен педагогикалық ұжымы, Жастар кеңесі мүшелері түсіндірме әңгімелер, кездесулер, рейдтер өткізуде», – деді Медет Жайдарбеков.
Көп балалы және аз қамтылған отбасылар ісі жөніндегі комиссияның қызметі туралы жұмыспен қамту және әлеуметтік бағдарламалар бөлімінің басшысы Альмира Байболова ақпарат берді. Оның сөзіне қарағанда,
— Ауданымызда 583 көп балалы отбасы бар. Оның 206-сы «Алтын алқа» және «Күміс алқа» иегерлері болса, 377 отбасының төрт және одан да көп кәмелетке толмаған балаларды тәрбиелеп отыр. Осыған орай, 10 адамнан тұратын комиссия құрылып, жұмыс атқарып жатыр, ол тұрақты негізде көп балалы және аз қамтылған отбасылардың проблемалық мәселелерін назарда ұстайды.
«Көп балалы және аз қамтылған азаматтардың арасынан 58 адам жұмысқа орналасуға өтініш білдіріп, соның ішінде 25 адам қоғамдық жұмыстарға, 1 адам әлеуметтік жұмыс орындарына, 8 адам тұрақты жұмысқа орналастырылды. 18 адам «Бастау Бизнес» жобасы бойынша кәсіпкерлік негіздерін оқуға жіберілді.
42 көп балалы отбасы баспана кезегінде тұр. 2021 жылдан бері «Бір қабатты Шығыс» бағдарламасы бойынша 16 көп балалы отбасы баспаналы болды, бүгінде бұл бағыттағы жұмыстар жалғасуда. Аудан бойынша 613 оқушыға жалпыға бірдей білім беру қорынан 40 мың 600 теңге көлемінде көмек көрсетілді. Демеушілік сондай-ақ, азық-түлік себеттері, қатты отын, дәрі-дәрмектер және т.б. түрінде тұрақты негізде көрсетіледі, – деді бөлім басшысы.
Аудан әкімі жиынды қорытындылай келе, талқыланып отырған мәселелердің маңыздылығын атап өтті, сондай-ақ, осы бағыттағы жұмыстарды жандандыру үшін тиісті нұсқамалар мен тапсырмалар берді. Әкімдік отырысының қорытындысы бойынша қаулы қабылданды.
Азамат Смагулов
