Жақында ауданымызда алғаш рет ұстаздар күніне арналған спартакиаданың ашылу салтанаты өтті. Білім саласының жанашырлары Бородулиха ауылының стадионға жиналып, өз өнерлері мен спорттық қабілеттерін көрсетті.
Іс-шараның салтанатты ашылуында аудан әкімі Айдар Ибраев, аудандық мәслихат хатшысы Сәуле Урашева, аудандық білім беру басшысының міндетін атқарушы Айжан Құрманова, мәдениет, тілдерді дамыту, дене шынықтыру және спорт бөлімінің басшысы Индира Бельская және ардагер ұстаздар қатысты. Алғашқы құттықтау сөз аудан әкімі Айдар Ибраевқа берілді. Ол барлық қатысушыны құттықтап, ұстаз мамандығы ең мәртебелі мамандық екендігін атай келе, мұғалім-тәрбиешілердің дене шынықтыру мен спортта да үлгі көрсетіп келе жатқандығына тоқталды. Сондай-ақ, ол жаңа бастамалар мен рекордтық нәтижелер, жеңіске деген ерік-жігер, Бородулиха ауданының даңқын асқақтатар чемпиондарды тәрбиелеп отырған ұстаздар қауымына жарыс жолында сәттілік тіледі.
Бұл күні келесі құттықтау сөз ардагер ұстаз Владимир Ульяновқа берілді. Ол да барлық қатысушыны құттықтап, ұйымдастырылған жарыстың маңыздылығына тоқталып, жарысқа қатысушыларға сәттілік тіледі. Бұл іс-шараға келген ардагер ұстаздар мұғалімдер қауымының қол жеткізген жетістіктерін мақтаныш етті.
Ауданның 20 мектебінен келген педагогтар жарыстың 5 түрі бойынша сайысқа түсті. Спорттық ойындар, атап айтқанда, волейбол мен үстел теннисі Әлихан Бөкейхан атындағы қазақ орта мектебінде, шахмат, тоғызқұмалақ Н. Островский атындағы орта мектепте, пневматикалық мылтықтан ату жарысы стадионда өткізілді.
Спартакиадада өткен шахмат турнирі мұғалімдердің логикалық және стратегиялық ойлау қабілетін ғана емес, олардың қозғалысты, нәтижені болжауға қабілеттілігін көрсетті. Шахмат тақтасындағы жекпе-жектер де тартысты өтті. Әйелдер арасында шахматтан бірінші орынды Ы. Алтынсарин атындағы орта мектептің мұғалімі Сағдат Абдыкарымова, ерлер арасында Егимбеков Дәулетхан иеленді. Тоғызқұмалақтан бірінші орынды әйелдер арасында Ы. Алтынсарин орта мектебінің ұстазы Өмір Байдалықызы, ерлер арасында бірінші орынды Жезкент кентіндегі мектеп-лицейдің мұғалімі Рустам Садвакасов жеңіп алды.
Спартакиадада пневматикалық мылтықтан ату сайысы назардан тыс қалмады. Мұғалімдер асқан дәлдікпен және шеберлікпен өздерінің тамаша мергендіктерін көрсетті. Комаров атындағы орта мектептің ұстазы Юлия Альтах әйелдер арасында мергендік танытты, ерлер арасында бірінші орынды Ы. Алтынсарин орта мектебінің мұғалімі Алексей Вялов иеленді.
Үстел теннисі ойыны да тартысты өтті. Мұғалімдер мергендік, дәлдік және рефлекс дағдылары бойынша сайысқа түсті. Көрермендер мұғалімдердің спортта да, оқуда да дарынды екендерін байқады. Әйелдер арасында бірінші орынды Камышенка орта мектебінің мұғалімі Айым Қалиоллаева, ерлер арасында Жерновка орта мектебінің мұғалімі Мақсат Алекпаев иеленді.
Волейбол жарысында командалар таңғажайып ойын өрнегін және жеңіске деген тынымсыз ұмтылысты көрсетті. Әр команда жеңіс үшін күресті, бірақ соңында бір ғана команда барлық кедергілерді жеңіп, жеңіске жетті.
Бірінші орынды Ә. Бөкейхан атындағы қазақ орта мектептің командасы, екінші орынды Жезкент кентінің мектеп-лицейі командасы, үшінші орынды Новопокровка орта мектебінің командасы иеленді. Командалық есепте бірінші орынды Жезкент кентінің мектеп-лицейі жеңіп алса, екінші орынды Жерновка орта мектебі, үшінші орынды Ы. Алтынсарин атындағы орта мектеп еншіледі.
Барлық жеңімпаз аудан әкімінің мақтау қағаздармен, кубок, медальдарымен және және бағалы сыйлықтармен марапатталды.
Спартакиада мұғалімдердің спорттық жетістіктерінің әсерлі көрінісі ғана емес, сонымен қатар, олардың тәжірибе алмасуға және әріптестерімен байланыс орнатуға берілген тамаша мүмкіндік болды.
Іс-шара соңында марапаттау рәсімі өтіп, жеңімпаздарға лайықты сый-сияпаттар табыс етілді.
Бородулиха ауданы мұғалімдерінің спартакиадасы – спорт пен білім беруді табысты ұштастырудың айқын дәлелі. Волейбол, үстел теннисі, шахмат, тоғызқұмалақ және мылтық ату мұғалімдерге өздерінің жігерін, табандылығын және ұжымдық жұмысын көрсетуге тамаша мүмкіндік сыйлады.
Сұлтан Ибрагимов
