23 маусым – Мемлекеттік қызметшілер күні. Мемлекеттік қызметшілер күнін мерекелеудің негізгі мақсаты — мемлекеттік қызметтің маңыздылығы мен қажеттілігін халыққа жеткізу, мемлекеттік сектордың басқару әлеуетін күшейту және мемлекеттік қызметтің оң имиджін қалыптастыру болып табылады.
Мемлекеттік қызметкерлердің ең басты міндеті – халыққа адал қызмет ету. Ұлт мәртебесін көтеретін, ел абыройын асқақтататын мемлекеттік қызметкер болу — абыройлы, әрі жүгі ауыр жауапкершілігі мол жұмыс.
Осындай абыройлы, әрі жүгі ауыр жауапкершілігі мол жұмысты атқарып жүрген мемлекеттік қызметші Бородулиха ауданы Новопокровка ауылдық округі әкімінің аппаратының бас маманы –Анар Мустина.
Анар Маратқызы 1996 жылы Бородулиха ауданы Новопокровка ауылындағы Новопокровка совхоз техникумын аяқтаған соң еңбек жолын Семей каласындағы «Бота» жеке кәсіпорнында тігіншіліктен бастаған. Кейін Новопокровка ауылы Мерей шаруа қожалығы асханасында аспазшы, Новопокровка ауылдық округінде спорт нұсқаушысы, Бородулиха ауданының арнаулы әлеуметтік қызмет көрсету орталығыда әлеуметтік қызметкер, Новопокровка ауылдық округі бойынша Арнаулы әлеуметтік қызметтер көрсету орталығыда мүмкіндігі шектеулі адамдарды күту бойынша әлеуметтік қызметкер болып қызметтер атқарған.
2020 жылдан бастап қазіргі уақытқа дейін Бородулиха ауданы Новопокровка ауылдық округі әкімінің аппараты бас маманы қызметін атқарып келеді.
Анар Маратқызының ең бірінші қасиеті – жауапкершілік жүгін терең сезіне білуі. Ол Новопокровка ауылдық округі әкімінің аппаратында жұмыс жасай жүре осыған жете мән береді. Қай істе болмасын, өзіне артылған жауапкершілік жүгін абыроймен атқарып, сенім үдесінен шығуға тырысып отырады. Әрбір азаматтардың өтініші мен ұсынысына сергек қарайды. Новопокровка ауылының экономикалық дамуына үнемі атсалысып отырады, халыққа жақын болып, кез келген жағдайда «қара қылды қақ жаратын» әділ маман.
«Ұлтына, жұртына қызмет ету – білімнен емес, мінезден» деп Алаш арысы Әлихан Бөкейхан айтқандай, Анар Маратқызы халыққа жақын, әр істе әділ болып, әрбір адамның мұң-мұқтажын қолдан келгенше түсініп, түсіндіріп, дұрыс жауап беріп, өзекті мәселені шешу өзінің парызы деп санайды.
Айтулы мерекеге орай Анар Мұратқызының халыққа қызмет ету жолындағы адал еңбегіне сәттілік тілейміз!
Шайза Доскеева,
«Жаңа уақыт»