Қазақстанда мерзімді әскери қызметті өтеген азаматтар үшін арнайы білім беру мүмкіндіктері қарастырылған. Бұл бастама әскери борышын адал атқарған жастарды қолдау және олардың білім алуына жағдай жасау мақсатында жүзеге асырылады.
ҚР Қорғаныс министрлігінің мәліметінше, мерзімді әскери қызметін аяқтаған азаматтар екі жыл ішінде жоғары оқу орындарына Ұлттық бірыңғай тестілеу (ҰБТ) нәтижесінсіз түсе алады.
Бұл мүмкіндік тек ақылы негізде оқуды таңдаған талапкерлер үшін қарастырылған. Оқуға қабылдау ЖОО-ның ішкі сұхбатының нәтижесі бойынша жүзеге асырылады.
Әскерде үздік көрсеткіштерімен көзге түскен сарбаздар арнайы гранттарға үміткер бола алады. Бұл гранттар әскери борышын адал атқарған және жоғары тәртіптілігімен ерекшеленген сарбаздарға беріледі.
Солардың бірі Жезкент кенттік округінің тұрғыны, жақында мерзімді әскери қызметін өтеп келген біздің жерлесіміз – Плотников Владислав.
Отанға адал қызмет еткені үшін әскери қызметшіге грант беріліп, сертификат табысталды.
Бұл грант тек қағаз емес, отанға сіңірген еңбегін мойындау, емтихансыз оқуға түсу (ҰБТ). тегін жоғары білім алу, жатақханамен қамтамасыз етілу, шәкіртақыға ие болу.
Грант Қазақстан Республикасының Президенті 2024 жылғы мамырда қол қойған жаңа заң шеңберінде берілді. Отанына лайықты қызмет еткен әрбір азамат нақты қолдауға ие болады.
Шайза ДОСКЕЕВА,
«Жаңа уақыт»