Бородулиха ауданының Зубаир ауылында Ұлы Отан соғысы жылдарында хабар-ошарсыз кеткен Оразғали Айбұланұлы Белібаевтің сүйегін туған жерінде қайта жерлеу рәсімі өтті.
Оразғали Белібаев 1941 жылы әскер қатарына шақырылып, 1943 жылы Старая Русса маңындағы шайқастардың бірінде ерлікпен қаза тапқан. Ұзақ жылдар бойы хабар-ошарсыз кеткендер санатында болды. 2024 жылдың қазан айында ресейлік «Медведь» іздестіру тобы жауынгердің сүйегін тапқан болатын.
Жауынгер туралы ақпаратты Қазақстанға «Майдан жолы» іздестіру жасағының командирі Александр Шитов жеткізді. Осы хабарды алған соң Арман Мұқанов жетекшілік ететін облыстық «Ерлік-Даңқ» іздестіру жасағы жауынгердің туыстарын іздестіру жұмысын бастады. Бұл іске еріктілер, мектеп оқушылары, архив қызметкерлері мен өлкетанушылар да белсенді атсалысты. Іздестіру нәтижесінде сарбаздың туыстары табылды.
28 сәуір күні Астана қаласындағы ҚР Қорғаныс министрлігінің Әскери-патриоттық музейінде жауынгердің сүйегін туыстарына тапсыру рәсімі өтті. Ал 3 мамыр күні Оразғали Белібаев туған жерінде қайта жерленді.
Зубаир ауылындағы жерлеу рәсімі әскери құрмет көрсетіле отырып өткізілді. Салтанатты шараға Абай облысы ішкі саясат басқармасының басшысы Айдар Садырбаев, Бородулиха ауданының әкімі Айдар Ибраев, Ресей Федерациясының Өскемен қаласындағы Бас консулы Алан Хетагуров, жауынгердің туыстары, сондай-ақ облыс тұрғындары мен қонақтары қатысты.
— Бүгін біз өзіміздің қаһарман батыр бабамызды жер қойнына тапсырып отырмыз. Соғыста хабар-ошарсыз кеткендерді еске алу — біздің азаматтық борышымыз. Олардың есімдері халық жадында мәңгі сақталады, — деп атап өтті Бородулиха ауданының әкімі Айдар Ибраев.
Ресей Федерациясының Қазақстан Республикасындағы Бас консулы Алан Хетагуров қаза тапқан жауынгерлердің рухын мәңгі есте қалдыру жолындағы үлкен еңбегі үшін қос елдің мемлекеттік құрылымдарына және іздестіру жасақтарына үлкен ризашылығын білдірді.
— Тарихын құрметтейтін жандардың арқасында майданда қаза тапқан жауынгердің сүйегі туған жеріне қайтарылды. Туған-туыстарының қандай сезімде екенін жақсы түсінемін. Әрбір қаһарман өз үйіне оралуы тиіс, — деді Алан Хетагуров.
Абай облысының Қорғаныс істері жөніндегі департаментінің бастығы Руслан Омаров жауынгердің сүйегін тапқан және елге жеткізген жандарға алғыс білдірді.
— Оразғали Белібаев сияқты жауынгерлердің ерлігінің арқасында бүгінде біз бейбіт өмір сүріп, ұрпақ тәрбиелеп, жарқын болашаққа ұмтылып келеміз, — деді ол.
«Ерлік-Даңқ» іздестіру жасағының жетекшісі Арман Мұқанов та Қазақстанның Ресей Федерациясындағы Елшілігіне, ресейлік іздестірушілерге, Абай облысы ішкі саясат басқармасына алғысын жеткізді.
Майдангерлердің ерен ерліктері — бүгінгі ұрпақ үшін өшпес өнеге.
«ЖУ» — ақпарат
