Бородулиха ауылында аудан әкімі Айдар Ибраевтың төрағалығымен кезекті аппараттық кеңес өтті. Жиында үш негізгі мәселе қаралды.
Аудан әкімінің орынбасары Қайрат Сапоров 2025 жылға жоспарланған жобаларды іске асыру барысы туралы баяндады.
— Аудан бойынша жалпы құны 1912951,3 теңгені құрайтын 14 жоба іске асуда. Жолдар жөнделіп, сумен жабдықтау желілері тартылып, спорт және балалар алаңдары орнатылуда.
• Песчанкада 5 көше жөнделіп, 83 жарық тірегі қойылды.
• Зенковкадағы жолдардың 90%-ы аяқталды.
• Переменовкада су желілері тартылуда.
• Петропавловка, Березовка және Дмитриевка ауылдарында жаңа алаңдар тұрғындардың игілігіне берілді.
• Алдағы уақытта Бородулиха ауылында жаңа сквер салынып, Поллог ауылында балалар алаңы ашылмақ. Сонымен қатар, төрт елді мекенде мал сою пункттері, жеті ауылда биотермиялық шұңқырлар салу жоспарланып отыр.
Екінші мәселе бойынша Қайрат Сапоров ауданда жұмыспен қамту картасының орындалуына да тоқталды.
— Аудан бойынша биыл 686 жаңа жұмыс орны ашылып, жоспардың 81,6%-ы орындалды.
Жұмыс орындары негізінен кәсіпорындар мен ұйымдарда, субсидияланатын уақытша қызметтерде және инфрақұрылымдық жобаларда ашылды.
«10 мың тұрғынға – 100 жаңа жұмыс орны» жобасы аясында 260 орын ашылуы тиіс болса, бүгінгі күні 152 орын іске қосылған.
Красный Яр, Петропавловка және Дмитриевка округтері жоспарды асыра орындаса, Жезкент пен Новошульба ауылдарында көрсеткіш әлдеқайда төмен.
Ағымдағы жылдың сегіз айының алдын ала қорытындылары бойынша күтілетін негізгі көрсеткіштер жайында Бородулиха ауданының кәсіпкерлік және ауыл шаруашылығы бөлімінің басшысы Альви Алиевич Мартаев баяндады.
Оның айтуынша, биыл өндірілген өнім көлемі өткен жылмен салыстырғанда едәуір артқан. Негізгі өсім өңдеу өнеркәсібінде байқалады.
Ауыл шаруашылығы саласында алғашқы жеті айдың қорытындысы бойынша айтарлықтай өнім алынған. Жыл соңына дейін бұл көрсеткіш еселеп артады деп күтілуде.
Негізгі капиталға тартылған инвестициялар көлемі де жылдан-жылға ұлғаюда. Құрылыс саласында да оң динамика бар: алдағы уақытта бірнеше жаңа тұрғын үй пайдалануға берілмек.
Сауда айналымы да тұрақты өсім көрсетіп отыр. Шағын және орта бизнес субъектілерінің саны күн санап артып келеді.
Жергілікті бюджетке түсетін кіріс жоспарға сай орындалуда.
Кеңес қорытындысында аудан әкімі атқарылып жатқан барлық жұмыстардың басты мақсаты – тұрғындардың өмір сүру сапасын арттыру екенін атап өтіп, жауапты сала басшыларына нақты тапсырмалар берді.
Бородулиха ауданы әкімінің баспасөз
қызметі
