2 қазан күні «AMANAT» партиясының Бородулиха аудандық филиалында Партиялық бақылау комиссиясының отырысы өтті. Жиынды комиссия төрағасы Жұмағали Рахимов ашып, жүргізді.
Күн тәртібінде ауданның 2025–2026 жылдардағы қысқы кезеңге дайындығы қаралды. Отырыста комиссия мүшелерімен бірге облыстық мәслихат депутаты Олег Давыдович, аудан әкімінің орынбасары Нұркен Қазембеков, аудандық аурухананың бас дәрігері Марат Қосамбаев және аудандық білім бөлімі басшысы Гүлнұр Катаева қатысты.
Негізгі мәселелер – жылыту маусымының барысы, жолдардың қардан тазалануы, денсаулық сақтау және білім беру нысандарын отынмен қамтамасыз ету.
Аудан әкімінің орынбасары Нұркен Қазембеков өз баяндамасында ауданда 32 қазандық жұмыс істейтінін, халықтың жалпы 96,3 мың тонна көмірге қажеттілігі бар екенін жеткізді. Бюджеттік ұйымдарға шамамен 9 мың тонна отын қажет. Қазіргі таңда негізгі әлеуметтік нысандардың жылу жүйелері тексеріліп, жөндеу жұмыстары аяқталды, көмір тасымалы жоспарлы түрде жүргізілуде. Бүгінде ауданға қажетті көмірдің 65%-ы жеткізілген.
Білім саласы бойынша, бөлім басшысы Гүлнұр Катаева мәлімдегендей, аудандағы 31 мектептің 23-і көмірмен жылытылады. Қыс қарсаңында Әуезов пен Комаров атындағы мектептердің қазандықтары ауыстырылды, ал Қамышенка мен Успен мектептерінде жөндеу жұмыстары 15 қазанға дейін аяқталуы тиіс. Жалпы білім беру нысандары үшін қажетті қатты отын мөлшері – 7,8 мың тонна, оның ішінде 3,2 мың тоннасы жеткізілді.
Аудандық аурухананың бас дәрігері Марат Қосамбаев медициналық мекемелердің толық дайын екенін атап өтті. Орталық аудандық аурухана өз қазандығымен қамтамасыз етілген, ал Жезкент кентіндегі аурухана «Востокэнерго» жүйесіне қосылған.
Жол мәселесіне де ерекше назар аударылды. Аудандағы жалпы жол ұзындығы – 718 шақырым, оның 337 шақырымы аудандық маңызы бар жолдар. Қысқы кезеңде жолдарды қардан тазалау және күтіп ұстау жұмыстары ауылдық округ әкімдіктері арқылы мемлекеттік сатып алу порталына сәйкес мердігер ұйымдармен келісімшарт негізінде жүргізілмек.
Қазіргі таңда қысқы маусымға дайындық қызу жүріп жатыр. Жолдарға қызмет көрсететін арнайы техниканы әзірлеу жұмыстары қолға алынып, оннан астам техника жөндеуден өткізілді.
Аудан әкімдігі өкілдерінің айтуынша, биылғы қыс мезгілінде жолдарды күтіп ұстау сапасына ерекше мән берілмек. Қардан уақытылы тазарту, көктайғақтың алдын алу үшін құм-тұз қоспасын себу, жол қозғалысының қауіпсіздігін қамтамасыз ету – басты міндет болып отыр.
Жол инфрақұрылымының қалыпты жағдайда болуы – ауыл тұрғындарының еркін жүріп-тұруы мен әлеуметтік нысандардың үздіксіз жұмыс істеуіне тікелей әсер ететіні атап өтілді.
Жиын қорытындысында барлық жобалар бірауыздан қабылданып, уақытылы атқарылған шаралардың мектептер мен ауруханалардың, мәдениет нысандарының тұрақты жұмысына және аудан тұрғындарының қауіпсіздігіне зор ықпал ететіні атап өтілді.
Партиялық бақылау комиссиясының мүшелері қысқы маусымға дайындықтың халық алдындағы үлкен жауапкершілік екенін баса айтты. Олардың айтуынша, әр үйде, әр мектеп пен ауруханада жылу мен қауіпсіздіктің қамтамасыз етілуі – басты міндет. Бұл бағыттағы жұмыстар жүйелі түрде жалғасып, қатаң бақылауда болады.
Ш.ДОСКЕЕВА,
«Жаңа уақыт»