Жыл сайын шілденің алғашқы жексенбісінде елімізде Ұлттық домбыра күні аталып өтеді. Ұлттық аспабымызды ұлықтауға арналған бұл мереке 2018 дәстүрлі түрде ұйымдастырылып келеді. Ондағы мақсат – қоғамды ұлттық мәдениет пен бірегейлікті сақтау мен қайта жаңғырту идеясының төңірегінде одан әрі топтастыру.
Биыл 29 шілдеде ауданымызда «Шығармашылық үйінің» ұйымдастыруымен Домбыра күні аталып өтті.
«Нағыз қазақ-қазақ емес, нағыз қазақ домбыра» деген Қадыр Мырза-әлінің сөзін ұран еткен халқымыздың көңіл төрінде домбыраның орны ерекше. Себебі, басынан небір қилы заман өтсе де, жаугершілікті бастан өткеріп, бодандық қамытын кисе де төл аспабы қолынан түспеді. Одан тараған қоңыр үн ұлт жадында тарих боп қатталып, шежіре боп шертілді.
Ел аузындағы аңыз бойынша әйгілі Шыңғыс ханға Жошының өлімін жеткізген де домбыра еді. Ал зерттеушілердің айтуынша, домбыра туралы алғашқы ғылыми деректер әл-Фарабидің жазбаларында «тамбур» деген атпен кездеседі.
Домбыра – қазақтың киесі, қасиетті қазынасы. Қазақ пен домбыра – егіз ұғым. Осыған орай, Ұлттық Домбыра күнінде «Күмбірле домбыра» атты челендж ұйымдастырылды. Челендждың мақсаты – білім алушыларды ұлттық рух пен отан сүйгіштікке тәрбиелеу, елдің мәдени мұрасын сақтап, балалар арасында ұлттық музыкалық аспапты насихаттау. Домбырашылар челенджі – балалар мен жастардың мұғалімдер мен ата-аналардың музыкалық өнер саласында шығармашылық жетістіктерін көрсету және домбыраны дәріптеу. Іс-шара ауыл мектептерінде өткізілді. Аудан бойынша ауыл мектептерінен челенджге қатысқан бала саны – 50. Өнерлі оқушыларымыздың шерткен күйлері көптің көкейінен шықты.
Талантты оқушыларымыз Нұрғиса Тілендиевтің «Әлқиссасын», Құрманғазының «Балбырауынын», «Желдірмесін», Халық күйі «Кеңесті», Ахмет Жұбановтың «Жастарын», Желдібаевтың «Ерке сылқымын», Халық күйі «Келіншекті» және т.б. күйлерді ойнай бастағанда жүрегімізге жылу ұялап, жанымызды жадыратты.
Домбыраның мәртебесі – ұлтымыздың мерейі, сондықтан ол қашанда биіктей берсе екен деп тілейміз. Біз осындай іс-шараларды жыл сайын өткізіп, талантты жастарымызды тәрбиелеп, олардың биік шыңдарға шығуларына тілектеспіз.
Құндылық – рухани-моральдық байлық. Оны ешбір нәрсемен өлшей алмайсыз. Бір дүниені анық түсінген абзал. Егер, халқымыздың сан ғасырлық мұрасын көздің қарашығындай сақтап, қастерлеп, болашақ ұрпаққа аманаттай алсақ, онда озғанымыз. Осы жағынан келгенде, айтылар ой көп.
Көңілде самсап тұрған сырлардың жөні бір бөлек. Жаһандану дәуірінен құтқаратын бірден-бір жәдігер болса, ол – домбыра. Сондықтан, оның қадіріне жетейік, ардақтап, дәріптейік дегіміз келеді.
Бородулиха аудандық
шығармашылық үйі