Бородулиха ауданының ауыл шаруашылығы саласында табандылықпен еңбек етіп, өңірдің дамуына үлес қосып келе жатқан азаматтардың бірі – Серғазы Жұмашұлы Әлменев. Оның еңбексүйгіштігі, жауапкершілігі, қарапайымдылығы мен адамгершілігі ауылдастарының құрметіне бөленген.
2006 жылы Серғазы Жұмашұлы «Жұмаш» шаруа қожалығын құрып, ауыл шаруашылығы өндірісін жаңа деңгейге көтерді. Қожалық дәнді дақылдар мен күнбағыс өсіру, мал азығын дайындау және мал шаруашылығын дамыту бағытында тұрақты әрі табысты жұмыс істеп келеді.
Өңірдегі азық-түлік қауіпсіздігін қамтамасыз ету мақсатында шаруашылық Семей қаласына ет өнімдерін тұрақты жеткізіп отырады. Бұл – кәсіптің ғана емес, азаматтың қоғам алдындағы жоғары жауапкершілігінің де айқын көрінісі.
Серғазы Жұмашұлының ауылдағы беделі кәсіпкерлік табыстарымен шектелмейді. Ол – қайырымдылық істерге әрдайым жанашырлық танытатын азамат. Шаруашылық аз қамтылған отбасылар мен жалғызбасты зейнеткерлерге жүйелі көмек көрсетіп, ауылдық округ пен аудан аумағында өтетін мәдени-спорттық және қоғамдық шаралардың белсенді демеушісі болып келеді. Оның тұрақты қолдауы ауыл тұрғындарының әлеуметтік жағдайын жақсартуға елеулі үлес қосып отыр.
Көмекке мұқтаж жандарға қолдау көрсетуге әрдайым дайын Серғазы Жұмашұлы ауылдастарының сеніміне ие болған абыройлы жан. Қарапайым болмысы мен тынымсыз еңбегі ел іші тарапынан ерекше құрметке бөленуіне негіз болып отыр.
Мереке қарсаңында Серғазы Жұмашұлы Әлменев облыс әкімінің Алғыс хатымен марапатталды. Бұл марапат – оның кәсіби шеберлігінің, туған жері үшін атқарған еңбегінің лайықты бағалануы.
Еңбегі еленген азаматтың табысты жолы – ауыл шаруашылығы саласына адал қызмет етудің, жауапкершілік пен адамгершілікті ту еткен еңбектің жарқын үлгісі.