Қоғамның зерделі қарттары бүгінгі жастардың таптырмас асыл қазынасы болып саналады. Қазақ халқының атадан балаға беріліп келе жатқан игі дәстүрі – үлкенді сыйлау, қарияны құрметтеу. Осы дәстүрді 1 қазанда болатын Халықаралық қарттар күні айқындайды. Осы мерекеге орай, еліміздің барлық жерінде қарттарды қолдаудың айлығы тұрақты түрде өткізіліп келеді.
Қарттар күні – еліміздің өркендеуі мен дамуы үшін қажырлы еңбек еткен, халқымыздың болашағы үшін тер төккен алдыңғы буын аға-апаларымыздың мерейлі төл мерекесі. Бұл орайда, бүгінде ортамызда жүрген қарияларымыздың бір кезде елі, халқы, келешек ұрпағы үшін жасаған игі істері ерекше орын алады. Сондықтан да қазіргі кезде біздің мемлекетімізде қарттарға үлкен мән беріп, көңіл аударып, үкімет тарапынан жан-жақты қамқорлық жасалуда. Ширек ғасырда Қазақстанның өсіп-өркендеуіне, еліміздің бейбітшілікте тыныш өмір кешуіне осы ардақты да аяулы қарттарымыз айтарлықтай өз үлестерін қосты деп есептейміз.
Қарттар – біздің асыл қазынамыз. Қарттарға қамқорлық – біздің халқымыздың санасына терең сіңген қасиет. Ел Президентінің сарабдал саясатының арқасында Қазақстанда ардагерлерге қамқорлық жасау бағытында ауқымды іс-шаралар жүзеге асырылуда.
Бүгінде Бородулиха ауданының әрбір округінде мыңдаған зейнеткермен қатар, тыл ардагерлері, ҰОС ардагерлері, ардақты азаматтар өмір сүріп жатыр.
Халықаралық қарттар күніне орай, Новодворовка ауылдық округінің Мәдениет үйінде ауылдық округтің 70-тен асқан бірқатар ардагерлері мен ақ жаулықты аналарына арналған мерекелік ақ дастархан жайылды. Подхоз Березовка ауылында барлық зейнеткерге арналған дастархан жайылып, құрмет көрсетілді. Қазыналы қарияларымыз бен ақжаулықты аналарымыз – біз үшін қымбат жандар. Олар бүкіл саналы ғұмырын, қажыр-қайратын ел игілігіне, ұрпақ тәрбиесіне жұмсады. Кейінгі буын да өз кезегінде алдыңғы толқын ағалардың салған сара жолын лайықты жалғастырып келеді. Мемлекет басшысы әрбір ардагердің, әрбір қарттың қажеттіліктерін ескеру, оларға қамқорлық жасау – біздің басты борышымыз екендігін ескертіп, айрықша мән беріп келеді. Иә, жасы үлкендердің өмірден көргені де, тұрмыстан түйгені де көп, өмірлік тәжірибесі мен тағылымы да мол, тыңдай білер құлаққа құйып алар ақылы да аз емес.
Салтанатты іс-шарада Новодворовка ауылдық округінің әкімі Еркежан Маутказинова қариялардың ұзақ жылғы қажырлы еңбегіне ризашылығын білдіріп, зейнеткерлікке шықса да күні бүгінге дейін Президенттің саясатын, оның халыққа арнаған Жолдауларын ел арасында насихаттап, мемлекетте қолға алынған барлық саяси науқандарға белсене қатысып жүрген жандарға алғыс айтып, дендеріне саулық, ұзақ ғұмыр, отбасыларына амандық тіледі.
Мерекелік іс-шарада Ивановка орта мектебінің оқушылары өз өнерлерін көрсетті. Қарттар да өлең айтып, би билеп, дастархан басында қалжыңдары жарасып, көңілдерін бір серпілтіп тастады. Ардагерлер округ көлемінде атқарылып жатқан жұмыстар төңірегінде өз ойларымен бөлісіп, мерекені ұйымдастырушыларға ризашылықтарын білдірді.
Осы орайда, біз қазыналы қарттарымызға бүгінгі ұрпақ үшін жасаған барлық жақсылығы үшін шынайы алғысымызды білдіреміз. Сіздерге зор денсаулық, көтеріңкі көңіл-күй, отбасыларыңыз бен замандастарыңыз арасында атап өтетін мереке күндері көп болсын деп тілейміз. Егде тартқан жастарыңыз еңселеріңізді түсірмей, өмірлік күш-қуаттарыңыз ұзағынан болғай!
Осындай ауқымды мерекені өткізуге атсалысқан округіміздің «Алмакос плюс», «Мен Агро», «Раушан», «Жумагулов», «Алиев ЖШС», «Кирдяев», «Баканов», «Береке», «Фоминых», «Колосок» шаруа қожалықтарының басшыларына алғысымызды айтамыз.
Новодворовка ауылдық округі