1 қазан – Қарттар күні. Бүгінде ортамызда жүрген қарияларымыздың бір кезде халқы, келешек ұрпағы үшін жасаған игі істерінің маңызы орасан. Сондықтан қазіргі таңда мемлекет қарттарға айрықша назар аударып, жан-жақты қамқорлық көрсетуде.
Ширек ғасырда Қазақстанның өсіп — өркендеуіне, еліміздің бейбітшілікте ғұмыр кешуіне ардақты да аяулы қарттарымыз айтарлықтай үлес қосты деп есептейміз. Қарттар – біздің асыл қазынамыз. Қарттарға қамқорлық – біздің халқымыздың санасына терең сіңген қасиет.
Қазақстанда ардагерлерге қамқорлық таныту мақсатында ауқымды іс-шаралар тұрақты түрде іске асырылып келеді. Мәселен, Бородулиха ауданында мыңдаған зейнеткермен қатар, тыл ардагері, ҰОС ардагері өмір сүріп жатыр.
Жуырда «Аян» кафесінде аудандағы әрбір ауылдық округтің тыл еңбеккерлері мен ардақты да салиқалы, ел үшін қажырлы еңбек еткен, кезінде шаруашылықтың әр саласында таңның атысы мен күннің батысына дейін тер төккен ақ жаулықты әжелер мен ақсақалды аталарымызды құрметтеу рәсімі өтті.
Қазыналы қарияларымыз – біз үшін қымбат жандар. Олар бүкіл саналы ғұмырын, қажыр-қайратын ел игілігіне, ұрпақ тәрбиесіне жұмсады. Кейінгі буын да өз кезегінде алдыңғы толқын ағалардың салған сара жолын лайықты жалғастырып келеді. Мемлекет басшысы әрбір ардагердің қажеттіліктерін ескеру, оларға қамқорлық жасау – біздің басты борышымыз екендігін ескертіп, ерекше мән беріп келеді. Иә, егде тартқан жандардың өмірден көргені де, тұрмыстан түйгені де көп, өмірлік тәжірибесі мен тағылымы да мол, тыңдай білер құлаққа құйып алар ақылы да аз емес.
Қарттар күніне арналған арналған салтанатты мерекеде аудан әкімі Айдар Ибраев ақсақалдарға көп жылдар ішінде сіңірген еңбектерін атап өте келе, зейнеткерлікке шықса да Президенттің саясатын, халыққа арнаған Жолдауларын ел арасында насихаттап, мемлекеттегі барлық саяси науқанға белсене қатысқандары үшін алғыс айтып, дендеріне саулық, ұзақ ғұмыр, отбасыларына амандық тіледі.
«Ауылыңда төбе болса, ерттеулі тұрған атпен тең, ауылыңда қария болса, жазулы тұрған хатпен тең», – дейді халқымыз. Сондықтан кезінде әр салада қызмет еткен, бүгінде немерелері мен шөберелерінің қызығын көріп отырған қазыналы қарттар әлі де жастарға білгендерін үйретіп, қамқоршы болып отырғаны қандай ғанибет?!
Қариялар талай заман куәсі ғой,
Аманатын бабамның арқалаған, – деп ақындарымыз жырлағандай, қай заманда болмасын қоғамда қарияларға деген құрмет, ізет-ілтипат ерекше, олардың даналықтары мен өмірден түйген мол тәжірибесі жастарға үлгі болуға тиіс.
Бұдан кейін қазыналы қарттарды аудандық маслихаттың хатшысы С. Урашева, «АМАNАТ» партиясының Бородулиха аудандық филиалының атқарушы хатшысы Г. Ильяшева, аудандық ардагерлер кеңесінің төрағасы Ж. Рахимовтар құттықтап, әр салада еселі еңбек етіп жүрген жастарды тәрбиелеп, өнеге көрсетіп отырған қарттардың дендеріне саулық, бақ-береке тіледі.
Іс-шараға шақырылған аталарымыз бен апаларымыз ақ дастарханнан дәм татты. Қарияларымыз өлең айтып, қалжыңдары жарасып, дастархан басында емен-жарқын әңгімелесіп отырды.
Әр округтен келген ардагерлер аудан көлемінде атқарылып жатқан жұмыстарға қатысты ойларымен бөлісіп, өңір басшысына, мерекені ұйымдастырушыларға өз ризашылықтарын білдірді.
Жиын соңында қарттарға гүл шоқтары мен сыйлықтар үлестірілді. Қарттарымыз да өздерінің ән-билерімен мерекенің көрігін қыздыра түсті. Бұл күні аудандық Мәдениет үйінің әншілері мен бишілері өз өнерлерімен жиналғандарға қуаныш сыйлады.
Ауданымыздың әрбір түкпірінен жиналған аталарымыз бен апаларымыздың мейрамы құтты болсын! Бүгінгі ұрпақ үшін жасаған әрбір жақсылықтарыңыз үшін шынайы алғысымызды білдіреміз. Сіздерге зор денсаулық, көтеріңкі көңіл-күй тілейміз. Өмірлік күш — қуаттарыңыз ұзағынан болғай!
Ербол Темирбулатов
