Бородулиха ауданы күре жолдың бойында орын тепкен өңір. Сондықтан да қауіпсіздікке баса мән беру, тәртіп пен ережелерді сақтаудың маңыздылығы зор. Әйтседе, автокөлік жолымен қатар, теміржол желісі бойында қараусыз жайылған төрт түлік мал қауіп тудырып тұр.
Жуырда Бородулиха ауданына қарасты Бақы ауылдық округі тұрғындарымен кездесу болып өтті. Басқосуға Ауыл станциясындағы желілік полиция бөлімінің бастығы Еркебұлан Құдайбергенов, Қызылауыл шекара бөлімшесінің басшысы Самат Әріпбай, округ әкімі Ербол Дюсетаев, Ауыл станциясының бастығы Қарлығаш Раймханова мен учаскелік полиция инспекторы Р.Омаркалиевтар қатысты.
Жиынды алғысөзбен ашқан ауыл әкімі күн тәртібінде өткір тұрған мәселе — жол бойындағы қараусыз жайылған мал екенін баса атап өтті. Бұл орайда Бородулиха ауданында жайылымдық алқаптың жеткілікті екенін айтып өткен ауыл әкімі биылмүйізді ірі қара малы үшін үш, ұсақ мал үшін екі отар, ал, жылқы түлігі үшін бір табын ұйымдастырылғанын айтты. Әйтседе, кейбір азаматтар малын қараусыз жібере салуын доғармай келеді. Соның себебінен гүлзарлар бүлініп, теміржол бойындағы пойыз қозғалысының қауіпсіздігіне нұқсан келеді.
Жиын барысында шекара бөлімшесі бастығы мен желілік полиция бөлімі басшылары да сөз алып, күн тақырыбындағы мәселе жайында пікір білдірді. Өз сөзінде Еркебұлан Құдайбергенов бірқатар мысалдар да келтіріп өтті. Атап айтсақ, жуырда 10 қыркүйек күні Белағаш ауылына таяу маңдағы теміржол бойында жүк пойызы жылқыны қағып кеткен. Ірі қара мал оқиға орнында өлді. Іздестіру нәтижесінде желілік тәртіп сақшылары А есімді азаматтың ірі қара малды желі бойына қараусыз жібергені анықталды. Тұрғын ҚР Әкімшілік құқықбұзушылық кодексінің 559 бабы, 1 бөлімі бойынша жауапқа тартылған.
-Теміржол — қауіптілігі аса жоғары аймақ. Оның бойына мал жаюға қатаң түрде тыйым салынады. Бұл тәртіп бұзылған жағдайда заң аясында қатаң шаралар қолдануға мәжбүр боламыз, — деді өз сөзінде желілік бөлім бастығы.
Жиын барысында сонымен қатар учаскелік инспектор Р.Омарғалиев та пікір білдіріп, алдағы уақытта желі бойындағы қараусыз мал қамалып, иесіне айыппұл салынуы мүмкін екендігін жеткізді. Қазіргі жағдай соған мәжбүрлеуде.
Басқосуда ауыл тұрғындары да сөз алып, республикалық трасса маңына арнайы белгі қою туралы ұсынысын білдірді. Жалпы жиын барысында жол бойындағы қауіпсіздікке байланысты бірқатар өзекті мәселелер талқыланып, сарапқа түсті.
Еркебұлан ҚҰДАЙБЕРГЕНОВ,
Ауыл станциясындағы желілік полиция бөлімінің бастығы,
Бородулиха ауданы