9–11 сәуір аралығында Алматы қаласында «Kazakhstan Smart Space-2025» Халықаралық байқауының финалдық кезеңі өтті. «Байқоңырдың болашағы – біздің қолымызда!» атты ұранмен өтткен байқауға Қазақстан, Қырғызстан, БАӘ, Ресей, Франция және Өзбекстаннан келген 60-тан астам жобалық команда қатысып, үш шығармашылық номинация бойынша сынға түсті.
Халықаралық шарада Бородулиха ауданының Жезкент кентіндегі мектеп-лицейдің 9-сынып оқушысы Нурали Амангельдыев І орынды иеленді.
Абай облысы білім басқармасы баспасөз қызметінің хабарлауынша, Нурали ғарыштағы нысандарды анықтап, олардың қозғалысын бақылап, лазер сәулесін дәл бағыттай алатын трекинг-камера ойлап тапқан.
Оқушының айтуынша, бұл технология болашақта спутниктерді сымсыз қуаттандыруға немесе алыс ғарыштағы кемелер арасында энергия жіберуге көмектесуі мүмкін. Құрылғы IMU-датчиктері (гироскоп пен акселерометр) мен автофокус жүйесі арқылы дәл бағытты ұстап тұрады.
Оқушы өз жұмысын қағаз жүзінде емес, VR-таныстырылым түрінде ұсынған. Көрсетілімде лазер сәулесінің қозғалыстағы нысанға бағытталуы, фокустың өзгеруі және екі ғарыш аппаратының әрекеттесуі көрсетілді. Виртуалды модельді жасау үшін Python мен Unity бағдарламаларын қолданған.
«Көрермендер жобамды оқып қана қоймай, өздерін ғарышта жүргендей сезінсе деймін», — дейді жас өнертапқыш.
Нуралидің жобасы бірнеше елден келген қатысушылардың жұмыстарынан озып шығып, болашағы зор жоба ретінде танылды.
Өз тілшіміз 