Жыл сайын еліміздің Қарулы Күштерінде әскери міндеттілердің оқу-жаттығу жиыны өтеді. Биыл ел тарихында тұңғыш рет мұндай жиынға 3 мыңға жуық әскери міндетті шақырылды. Оның бір жарым мыңы 18 шілде мен 16 тамыз аралығында «Шығыс» өңірлік қолбасшылығының «Абай» гарнизонына қарасты «Шығыс» оқу-жаттығу полигонында жаттығады. Аталмыш жиынға Бородулиха ауданынан әскери міндетті 4 офицер және 38 солдат сержант қатысады. Оларды аудан орталығынан шығарып салу рәсіміне аудан әкімінің орынбасары Е. Селиханов қатысып, сәттілік тіледі.
18-19 шілде күндері Павлодар, Шығыс Қазақстан және Абай облыстарының әскери міндеттілері белгіленген әскери бөлімге келді. Әскери міндеттілері барлық әскери киім-кешек, құрал-жабдықтармен қамтамасыз етіліп, әскери бөлімінің базасында құрылған дала лагеріне қоныстанды. Әскери жиындар аясында әскери дайындық сабақтары басталған Семей қаласына Қорғаныс министрінің бірінші орынбасары — Қарулы Күштердің Бас штаб бастығы генерал-лейтенант Сұлтан Камалетдинов келді.
Ал 20 шілде күні Қарулы Күштердің Бас штаб бастығы Сұлтан Камалетдиновтің, Абай облысы әкімінің орынбасары Димитрий Гариковтің және әскери сала қызметкерлерінің қатысуымен «Шығыс» түраралық полигонында жұмылдыру жиынының салтанатты ашылуы өтті.
Әскери бөлімдердің жауынгерлік және жұмылдыру даярлығы деңгейін арттыру, Қазақстан Республикасының Қарулы Күштері, басқа да әскерлері мен әскери құралымдары үшін қажетті әскери оқыту резервін дайындау және запаста жинақтау мақсатында ұйымдастырылған жиынның ашылуында сөз алған Сұлтан Камалетдинов әскери міндеттілерді даярлауды қажетті деңгейде ұстап тұрудың маңыздылығын атап өтті.
— Бүгінде біздің күш-жігеріміз аумақтық қорғаныс жүйесін дамытуға және нығайтуға бағытталған. Бұл Қарулы Күштердің жауынгерлік әлеуетіне де әсер етеді. Қарулы күрестің жаңа тәсілдері мен құралдары пайда болған жағдайда, аумақтық қорғаныс бригадаларының тіркелген құрамының білімін жаңарту және дағдыларын жетілдіру қажеттілігі туындайды, — деді министрдің бірінші орынбасары.
Ал облыс әкімінің орынбасары азаматтарымыз әлемде орын алған саяси оқиғалардан хабардар болып, түрлі қауіп-қатерге қарсы тұруға әрдайым әзір болуы керектігін атап өтті.
— Басқа мамандықты игеру екінші білім алумен тең. Дегенмен әскери міндеттілерді бір айдың ішінде өзге мамандыққа қайта даярлау — бүгінгі заманның талабы. Бір ай аз уақыт емес. Оқу-жаттығудан өтетін әскери міндеттілерге сәттілік тілеймін, – деді Д.Гариков.
Полигонда әскери міндеттілерді даярлау үшін барлық жағдай жасалған. Арнайы далалық лагері қажетті жабдықтармен жарақталып, жиынға қатысушылар үшін күнделікті тұрмысқа қажетті қызмет көрсету бөлмелері мен жауынгерлік дайындық үшін қажетті нысандар дайындалған.
Мұнда 41 әскери-есептік мамандық өкілдері өз білімдері мен дағдыларын жетілдіретін болады. Бір ай ішінде мотоатқыштар, танк, артиллерия, зениттік бөлімшелердің, жауынгерлік, тылдық және техникалық қамтамасыз ету мамандары, сондай-ақ жауынгерлік машиналардың механик-жүргізушілері де қайта даярлаудан өтеді.
— Жиынның алғашқы аптасында әскери міндеттілерге қауіпсіздік шаралары бойынша сабақтар өткізіледі. Содан кейін өздерінің мамандықтарына қарай бөлімшелерге бөлінеді. Сонымен қатар әскери-патриоттық тәрбие сағаттары ұйымдастырылады,- деді «Шығыс» өңірлік қолбасшылығы әскерлері қолбасшысының орынбасары полковник Дархан Ажибаев.
Сала мамандарының айтуынша, мұндай жиындарға азаматтарымыз өз еркімен келеді екен. Олардың бірі – Жезкент кентінің 25 жасар тұрғыны Айбар Айдарұлы.
— Мен Д.Серікбаев атындағы ШҚТУ әскери кафедрасын аяқтағанмын. Білген білімімізді нақтылап, жетілдіру мақсатында әскери жиынға қатысуға келдім. Біз әрдайым Отанға адал қызмет етуге дайын болуымыз керек. Әскери ортаға тағы да келгеніме қуаныштымын. Бұл бұрын үйренген дағдыларды қайталап, жаңа әдістерге машықтануға жақсы мүмкіндік, — дейді жиынға қатысушы Айбар Айдарұлы.
Айта кетейік, әскери бөлімге дейін және кері қарай жол жүру уақытын қоса алғанда, жиын кезеңінде әскери міндеттілердің жұмыс орны, атқаратын лауазымы сақталады, оларға республикалық бюджеттен орташа айлық жалақы төленеді. Ал жұмыс істемейтіндер ең төменгі жалақы — 85 000 теңге алатын болады.
Жиын соңында сынақтар өткізіліп, оның нәтижелері бойынша бағдарламаны сәтті меңгерген әскери міндеттілерге кезекті әскери атақтар берілетін болады.
Ай-Керім СӘРСЕНҚАЛИ,
«Жаңа уақыт» 
