Жуырда Бородулиха ауданында Қазақстанның халық әртісі Мәдениет Ешекеев атындағы «Қазақтың дара дарыны» атты І республикалық дәстүрлі әншілер байқауы болып өтті. Аудандық Мәдениет үйінде өткізілген аталмыш шараға еліміздің әр түкпірінен есімдері республикамызға танымал әйгілі мәдениет саласының өкілдері мен қатысушылар арнайы келді.
Бұл күн – өнерге, ұлттық мұраға деген шынайы құрметтің көрінісі екендігі анық.
Байқау Мәдениет Сейітжанұлы Ешекеевтің өмір жолы мен шығармашылығына арналған «Бүлкілдер әнге салса көмекейі» атты кітаптың тұсаукесерімен ашылды. Бұл басылым – атақты жерлесіміз, Абай әндерін насихаттаушы өнер иесінің рухани мұрасын сақтау жолындағы тағы бір маңызды қадам саналады.
Сөз орайында айта кетелік, қазақтың әйгілі әншісі, Қазақстанның Халық артисі Мәдениет Ешекеев 1934 жылы (құжат бойынша 1936) қазіргі Абай облысы Бородулиха ауданы Құрманқожа ауылында дүниеге келген. Жасынан әнге құмар болып өсіп, ағасы Жұқабайдан тәлім алып, сол кездегі радиодан Ж.Елебеков, М. Ержанов секілді әншілерді тыңдап, үлгі тұтып өседі. Осылайша, 1955 жылы облыстық көркемөнерпаздар байқауында өнер көрсетіп, Алматыдағы республикалық байқауға жолдама алып, лауреат атанады. Сол жолы Ж. Елебековке кездесіп, шәкірт болып ереді. 2017 жылы Құрманғазы атындағы Қазақ ұлттық консерваториясында М. Ешекеевке арнап республикалық конференция, үлкен гала-концерт ұйымдастырылып және домбырасы Ықылас Дүкенұлы атындағы халық аспаптар музейіне қойылып, «Сұржекей» атты жинағы құрастырылған болатын. Биыл осы жинақ М.Ешекеевтың 90 жылдығы қарсаңына орай, оның айтуындағы кейіннен ел ішінен табылған әндері және ол туралы мақала, сұхбаттармен (өз мақалалары да табылды) толықтырып, «Бүлкілдер әнге салса көмекейі…» деген атпен қайта жарыққа шығарылды. Кітаптың құрастырушылары әншінің шәкірттері Толғанбай Сембаев, Еркін Шүкіман сынды танымал өнерпаздар екенін де айта кету ләзім.
Жаңа кітаптың таныстырылымынан соң ән байқауына іріктеу кезеңі басталды. Еліміздің түрлі өңірлерінен келген 30-ға жуық өнерпаз екі күн бойы халық әндерін, Абай туындыларын және Мәдениет Ешекеевтің репертуарындағы шығармаларды орындап, қазылар алқасының назарына ұсынды. Атап айтсақ, аталмыш байқауға қатысушы Астана, Алматы, Көкшетау, Балқаш қалаларынан және Ақмола, Қарағанды, Павлодар облыстарынан келген 18 бен 35 жас аралығындағы жалпы саны 24 үміткер бірінші кезеңде бақ сынап, өз өнерлерін ортаға салды.
Қазылар алқасының құрамында қазақтың дәстүрлі ән өнерінің көрнекті өкілдері Рамазан Стамғазиев, Еркін Шүкіман және Ерлан Рысқали мен Толғанбай Сембаев сынды бірқатар танымал өнер иелері болды. Олардың шешімімен екінші кезеңге 15 қатысушы жолдама алды. Осылайша ең үздіктер анықталды. Барша өнерпаздар арасынан үздік өнерімен танылып, суырылып алға шыққан Астана қаласынан келген жас әнші Айдос Саниязбекұлы бас жүлдені жеңіп алып, 1000 000 млн теңге сыйлықты иеленді. Бірінші орынды Абай облысының атынан сынға түскен Таңат Мұқашев алып, 750 мың теңгені қанжығасына байлады.
Сонымен қатар, екінші орынға екі өнерпаз, үшінші орынға үш өнерпаз лайық деп танылып, арнайы қаржылай жүлделерді өзара бөлісті. Мұнымен қоса, өзге әншілерге арнайы жүлделер табысталып, тағы бес өнерпаз байқаудың дипломанттары атанды. Ал, Бородулиха ауданы әкімінің арнайы жүлдесін Алматы қаласынан келген өнерпаз Абдуррахман Естайұлы иеленді.
Байқау соңы гала концертке ұласып, барша жұртшылықты ұлттық өнердің қайнарымен сусындатты.
Аталмыш байқау ұлттық музыка өнері мен жас ұрпақты патриоттық рухта тәрбиелеуге қосылған зор үлес екендігі анық.
Ай-Керім СӘРСЕНҒАЛИ,
«Жаңа уақыт»
