Апта дүйсенбісінен бастап аудан әкімі Айдар Ибраевтың халық алдында есеп беру кездесулері басталды. Бұл жолғы алғашқы кездесу Бақы ауылдық округінде өтті.
Жиында әуелгі кезекте Бақы ауылдық округінің әкімі Ербол Дүйсетаев есеп беріп өтті. Одан кейін аудан бойынша ағымдағы жылғы атқарылған жұмыстар жайында аудан басшысы баяндама жасады.
Жиын барысында тұрғындар өңірдегі бірнеше мәселені көтерді. Атап айтсақ, электр қуатын жоспарлы түрде өшіру, электр желілеріне кедергі келтіретін ағаштарды кесудің қажеттілігі, «Қазпошта» АҚ филиалы ғимаратының жағдайы, қысқы жолдарды күтіп ұстау, Аул-Коростели жолын жөндеу, сондай-ақ ауданға спорт жаттықтырушысы штатын беру туралы сұрақтарды көтерді. Бұл ретте аудан әкімі алдағы уақыттарда барлық қозғалған мәселелер қолға алынып, нақты шаралар қабылданатындығын жеткізді.
Кездесуден кейін мекемелердің жағдайын көру үшін Ауыл ауылындағы медициналық пункт, бастауыш мектеп және Қазпошта бөлімшесін араладым. Сонымен қатар, жергілікті Коростелевская орта мектебінің қазандығын қарап, мектептің тұрақты жылумен қамтамасыз етілгеніне көз жеткізді.
Сол тәрізді Айдар Ибраев Дмитриевка ауылдық округінде де есеп беру кездесуін өткізді. Жиын барысында тұрғындар бірнеше маңызды мәселелерді көтерді. Атап айтсақ, жергілікті халық бірнеше жылдан бері ауылда учаскелік полиция қызметкерінің жоқтығына алаңдаушылық білдірді. Айдар Маратұлы бұл мәселені өз бақылауына алып, шешуге күш салатынын айтты.
Жиын барысында сондай-ақ, шағын орталықты кеңейтіп, қосымша ғимарат салу мүмкіндігін қарастыру да ұсынылды. Себебі, ауылда балалар саны жыл өткен сайын артып келеді. Бұл мәселе де бақылауға алынды.
Басқосуда ауылдық клубты күрделі жөндеуден өткізу және орта мектептегі оқу-тәрбие үдерісі мәселесі де көтерілді.
Осыдан кейінгі есептік кездесу Белағаш ауылдық округінде өткізілді. Ауылдық округ әкімінің баяндамасынан кейін аудан әкімінің аудандағы ағымдағы жылғы атқарылған жұмыстары туралы есеп беріліп, соңынан тұрғындар өз сауалдарын қоя алды.
Белағаштықтар ауылдағы көшелерді жөндеу сапасы, фельдшерлік пунктке күрделі жөндеу жұмыстарын жүргізу, босаған кітапхана ғимаратының орнына толыққанды пошта бөлімшесін ашу сияқты ұсыныстарды айтты.
Бұл ретте Айдар Маратұлы орындалған шаралар туралы да жеткізді. Атап айтсақ, тұрғындар тарапынан алдыңғы кездесулерде айтылған өтініш бойынша Дүйсекен ауылында интернет желісі орнатылып, жолды грейдерлеу жұмыстары жүргізілгенін атап өтті. Сонымен қатар, Семей қаласында тұратын жерлестердің демеушілігімен бүгінгі таңда мешіт құрылысы қолға алынды.
Сол тәрізді Степной ауылдық округінде де есеп беру кездесу өтті. Кездесу барысында келесі жылға арналған жоспарлар мен тұрғындарды толғандыратын түйткілді мәселелер қатары кеңінен талқыланды.
Алдағы жоспарлардың қатарында Шелехово ауылындағы төрт көшеге, сондай-ақ Қызылтай ауылындағы көшелерге жарықтандыру орнату да бар. Дегенмен, бірнеше проблемалық мәселелер орын алуда. Соның бірі — облыстық жолдың жағдайы болып отыр. Биыл Петропавловкадан Шелехово ауылына дейінгі учаскеде бірнеше шақырым жөндеу жұмыстары жүргізілді, бірақ Шелеховодан Зенковкаға дейінгі учаске әлі де назар аударуды қажет етеді. Тұрғындар қыс мезгілінде электр қуатының жиі істен шығуы мәселесіне ерекше назар аударды. Адамдар жиі жарықсыз қалады, бұл әсіресе қыстың суық күндері біршама қиындық тудырады.
Аудан әкімі өз сөзінде бұл мәселелерді шешу жолдарын, тиімді тәсілдерін қарастыратынын жеткізді. Барлық көтерілген мәселелер аудан басшылығы тарапынан арнайы бақылауға алынады.
Сөз соңында айта кетсек, аудан әкімі Айдар маратұлының тұрғындар алдындағы есептік кездесулер әлі де жалғасып жатыр.
Ай-Керім СӘРСЕНҚАЛИ,
«Жаңа уақыт»