Биылғы жылдың аяқталуына да санаулы күндер қалды. Жыл бойы ауданның әл-ауқатын арттыру бағытында елеулі істер, тұрғындардың өмір сүру сапасын жақсарту мақсатында бірқатар жобалар жүзеге асты.
Аудан әкімі Айдар Ибраев өткен аптада Новодворовка ауылдық округінде есеп беру кездесуін өткізіп, атқарылған істермен таныстырып, келер жылдың жоспарларымен бөлісті.
Аудан әкімі айтқандай, биылғы жылдың қаңтар-қазан айларында өнеркәсіптік өнім өндірісінің көлемі 55 миллиард 363 миллион теңгені құрады, бұл өткен жылдың тиісті кезеңіне қарағанда 107,7% өсті.
Жекелеген салаларға тоқталсақ, биылғы жылы 356 мың 716 га алқапқа егін егіліп, жиналған. Мал шаруашылығы ауыл шаруашылығы жалпы өнімінің 35%-ын
құрайды. Ауданда 403 ауылшаруашылық тауар өндірушісі тіркелген.
Ауылшаруашылық техникасын жаңарту жұмыстары қарқынды түрде жүргізіліп жатыр.
Инфрақұрылымды жақсарту мақсатында Камышенка, Жерновка, Новая
Шульба, Дмитриевка ауылдарында төрт футбол алаңы орнатылды, Жерновка ауылында бір хоккей корты және Ивановка ауылында воркаут алаңы орнатылды. Бородулиха ауылында жүзу бассейні бар дене шынықтыру-сауықтыру кешенінің ашылуы өтті. Бұдан бөлек, Бородулиха ауылында 47 бейнебақылау камерасы орнатылды.
«Ауыл-ел бесігі» жобасы аясында биылғы жылға 191 миллион 700 мың теңге бөлініп, ауылдық округтердің көшелеріне, 403 жарықтандыру бағаны орнатылды. Жолдары жөнделді. Биыл 17 екі пәтерлі тұрғын үйдің құрылысы аяқталып, 34 отбасы қоныстой тойлады. Аудан көлеміндегі 12 мектепте ағымдағы жөндеу жұмыстары жүргізіліп, жеті пән кабинеті сатып алынды.
Ауылдық аймақтардағы негізі мектептердің әлеуетін арттыру жобасы аясында Бородулиха ауылындағы А. Бөкейхан атындағы қазақ мектебі жаңартылып, 30-дан астам заманауи оқу және зертханалық құралдармен жабдықталды. Успенка ауылында медициналық пункт ашылды, сондай-ақ
Ауыл станциясында фельдшерлік-акушерлік пункт және Новая Шульба
ауылында дәрігерлік амбулатория ашу жоспарлануда. Жалпы, қай саланы алсақ та өткен жылмен салыстырғанда ілгерілеушілік басым. Келер жылы да ауқымды істер атқарылады деп жоспарланып отыр.
Тұрғындар тарапынан көше жарығын орнату, көктемгі су тасқынының алдын алу, ауылға кіре берістегі саябақты абаттандыру, «Қазпошта» АҚ бөлімшесінің жұмысы, Березовка ауылындағы клуб ғимаратының жағдайы, Ивановка ауылында дәріхана ашу, интернет жылдамдығының сапасы мәселелері көтерілді. Сауалдарға жауап берген Айдар Маратұлы тиісті сала басшыларына тапсырма жүктеді.
Ай-Керім СӘРСЕНҚАЛИ,
«Жаңа уақыт»
