Бородулиха ауданына қарасты Петропавловка ауылында елге еңбегі сіңген, ауылдың әлеуметтік дамуына ұдайы үлес қосып келе жатқан азаматтардың бірі – шаруашылық жетекшісі Евгений Геннадьевич Жбратов. Қай істің де басы-қасынан табылатын, туған ауылына жанашырлықпен қарайтын ол – өңір тұрғындарының ерекше құрметіне ие жан.
Евгений Геннадьевич «Жасмин» шаруашылық серіктестігін басқара жүріп, ауылдың әлеуметтік мәселелеріне әрдайым назар аударып келеді. Ол көптеген жылдар бойы округтегі аз қамтылған отбасыларға, көпбалалы және жалғызбасты тұрғындарға тұрақты көмек көрсетіп, жергілікті меценат ретінде танылған.
Ауыл инфрақұрылымын жақсартуға да белсене атсалысып жүр. Оның демеушілігімен бірқатар елді мекендерде көше жарығы орнатылып, жолдарды грейдерлеу жұмыстары жүргізілді. Білім саласын қолдау да – оның басты бағыттарының бірі. «Мектепке жол» акциясы аясында аудан оқушыларына қажетті оқу құралдарын алуына қолдау көрсету дәстүрге айналған.
Сонымен қатар Петропавловкада бой көтеруі жоспарланған спорт-сауық орталығының жобалық-сметалық құжатын әзірлеуге де жеке қаражатынан қаржы бөліп, ауыл жастарының бос уақытын тиімді ұйымдастыруға мүмкіндік жасауға өз үлесін қосты.
Қыс мезгілінде қар тазалау, су тасқынына қарсы шаралар, рұқсатсыз қоқыс орындарын жою сияқты жұмыстарға техникалық көмек көрсетіп отыруы – оның ауылды таза әрі қауіпсіз ұстауға деген жауапкершілігінің белгісі.
Қожалықта бүгінде 15 адам тұрақты жұмыспен қамтылған. Бұл – ауылдағы әлеуметтік тұрақтылықты сақтауға үлкен үлес. Соңғы жылдары шаруашылық өндірістік базасын жаңартып, егістік көлемін ұлғайтып, мал басын көбейтіп келеді. Машина-трактор паркі толық жаңартылып, шаруашылықтың материалдық-техникалық әлеуеті нығайған. Жбратов басқарып отырған шаруашылық – округтегі ең ірі және тұрақты дамып келе жатқан қожалықтардың бірі. Соңғы үш жылда экономикаға 500 миллион теңгеден астам инвестиция құйылған.
Ауылдастары Евгений Геннадьевичті ең алдымен қарапайым, еңбекқор, адал мінезді жан ретінде таниды. Жұмысқа талапшыл, қарым-қатынаста ашық, ауылдастарының мәселесіне бейжай қарамайды. Үш баланың әкесі ретінде үлгілі отбасы иесі, қоғамдық өмірдің бел ортасында жүретін азамат ретінде де ел ішінде беделі жоғары.
Осы еңбектері мен ауыл дамуына қосқан елеулі үлесі үшін Евгений Геннадьевич Жбратов IIІ дәрежелі «Еңбек Даңқы» орденімен марапатталды.
Бұл марапат – оның кәсіби еңбегінің ғана емес, туған жерге деген жанашырлық көзқарасының, азаматтық ұстанымының лайықты бағасы.
Ш.ДОСКЕЕВА,
«Жаңа уақыт»