19 қазан елімізде Құтқарушылар күні ретінде аталып өтеді. Бұл күн – халықтың тыныштығы мен қауіпсіздігін қамтамасыз етіп жүрген батыл жандардың еңбегін айрықша дәріптейтін мереке. Тілсіз жаумен тайсалмай күресіп, адам өмірін құтқару үшін өз басын қатерге тігетін құтқарушылардың ерлігі – ел үшін мақтаныш.
Осындай ел қорғандарының бірі – Бородулиха аудандық Төтенше жағдайлар бөлімінің аға тергеушісі, азаматтық қорғау майоры Арман Михайлович Қарымсақов.
Арман Михайлович 1978 жылы 21 қарашада Семей облысы Шар ауданы Суықбұлақ станциясында дүниеге келген. Балалық шағы еңбек пен жауапкершілікті бойына сіңірген ауылдық ортада өтті. Дмитриевка ауылындағы Киров атындағы орта мектепті тәмамдаған соң тракторшы болып еңбекке араласты.
Әскер қатарына шақырылғанда Алматы қаласындағы №97617 әскери бөлімінде борышын өтеп, бөлімше командирі болды. Бұл кезең оның бойындағы тәртіп пен шыдамдылықты қалыптастырып, болашақтағы қызметіне үлкен мектеп болды.
Әскерден кейін ол азаматтық қорғау саласына келіп, қарапайым өрт сөндіруші қызметінен бастады. Жас маман ретінде от пен түтінге толы қиын сәттерде қайсарлық танытып, тәжірибесін жетілдірді. Уақыт өте келе күзет бастығы, бөлім орынбасары, инженер қызметтерін абыроймен атқарып, кәсіби тұрғыда өсе білді.
2010 жылы Көкшетау техникалық институтын «Өрт қауіпсіздігі» мамандығы бойынша тәмамдап, алған білімін тәжірибемен ұштастырды. Қазіргі таңда Бородулиха аудандық ТЖ бөлімінде аға тергеуші қызметін атқарып, өрт оқиғаларының себептерін зерттеп, алдын алу жұмыстарын ұйымдастыруда.
Құтқарушының жұмысы – әрқашан тәуекел мен батылдықты талап етеді. Әр шақырту – жаңа сынақ, жаңа жауапкершілік. Арман Михайлович осы қиындықтардың барлығына төтеп беріп, елге адал қызмет етіп келеді. Оның әрбір атқарған ісі – қызметіне адалдықтың, кәсібіне деген шынайы сүйіспеншіліктің, отансүйгіштіктің көрінісі.
Арман Михайлович – қызметте де, отбасында да үлгі боларлық азамат. Жұбайы Әсем Мұратқызы екеуі үш перзент тәрбиелеп отыр. Балалары білімге құштар, әрқайсысы болашақта елге пайдасын тигізетін азамат болуға талпынып келеді.
Арман Қарымсаков – бүгінгі қоғамдағы нағыз қаһарман бейнесі. Оның адал еңбегі мен ерлікке толы жолы жас ұрпақ үшін өнеге.
Құтқарушылар күні қарсаңында ел тыныштығы үшін елеусіз еңбек етіп жүрген барлық батыр азаматтарға алғыс айтамыз. Арман Михайлович сынды ерлердің арқасында еліміздің әрбір тұрғыны өз қауіпсіздігіне сеніммен қарайды.
Оларға мықты денсаулық, отбасына амандық, еңбектеріне толағай табыс тілейміз!
Ш.ДОСКЕЕВА,
«Жаңа уақыт»