Аудан әкімі жұмыс сапары барысында бірнеше ауылдық округтерді аралап, тұрғындар үшін маңызды нысандардың құрылыс барысымен танысты.
Дмитриевка ауылдық округінде көпбалалы отбасылар мен әлеуметтік жағынан осал санаттағы азаматтарға арналған екі пәтерлі үш үйдің құрылысы жүріп жатыр. Бұл жоба тұрғын үй кезегін қысқартуға мүмкіндік бермек. Сонымен қатар ауылдағы Мәдениет үйінің жөндеу жұмыстары аяқталуға жақын, жуық арада тұрғындар жаңартылған мәдениет ошағына ие болады.
Новопокровка ауылдық округінде дәрігерлік амбулатория күрделі жөндеуден өтуде. Жұмыстар кестеге сәйкес жүргізіліп, сапасы қатаң қадағаланып отыр. Сондай-ақ ауылдық клуб құрылысының іргетасы құйылды. Жоба екі жылға жоспарланған, мердігермен мерзімді сақтау мен сапаны қамтамасыз ету мәселелері талқыланды.
Петропавловка ауылдық округінде спорттық-демалыс орталығының құрылысы аяқталуға таяп қалды. Нысанда ішкі әрлеу, сыртқы аумақты абаттандыру жұмыстары жүргізілуде. Сонымен қатар дәрігерлік амбулатория ғимараты жаңартылып, тұрғындарға қолайлы жағдай жасауға бағытталған.
Подборный ауылдық округінде, Камышенка ауылында, ауылдық клубтың құрылысы басталды. Мұнда да көпбалалы және әлеуметтік жағынан осал санаттағы отбасыларға арналған екі пәтерлі екі үй салынуда.
Бородулиха ауылында биыл екі пәтерлі 12 үйдің құрылысы жүргізіліп жатыр. Қазіргі таңда қабырғалары қаланып, шатырлары орнатылып, ішкі әрлеу жұмыстары жүргізілуде. Су желісі тартылып, көшелерді абаттандыру ісі қатар атқарылуда. Өткен жылғы қателіктер ескеріліп, жұмысты ұйымдастыру тәртібі жетілдірілген.
Белағаш ауылдық округінде, Зенковка ауылында тұрмыстық қалдықтар полигонын ретке келтіру жұмыстары басталды. Бұл шара «Таза Қазақстан» экологиялық акциясы аясында жүзеге асырылып отыр.
– «Тұрғындардың өтініштері ескерусіз қалмайды. Әр мәселе бойынша шешім қабылданып, соңына дейін жеткізіледі. Бейжай қарамай, белсенділік танытып жүрген ауыл азаматтарына ризашылығымды білдіремін», – деді аудан әкімі.
Өз тілшіміз
