Бородулиха ауданында аудан әкімі Айдар Ибраевтың төрағалығымен кезекті әкімдік отырысы өтті. Отырысқа аудан әкімінің орынбасарлары, аудандық мәслихат төрағасы, дербес бөлім басшылары, ауыл және кент округтерінің әкімдері, сондай-ақ бұқаралық ақпарат құралдары өкілдері қатысты.
Отырыс барысында аудан әкімі Бородулиха ауданының статистика бөлімінің жаңа басшысы Тимур Леонидович Абулхасеновті таныстырды.
Жиында 2025 жылғы бюджетінің орындалу қорытындылары қаралып, бірқатар маңызды бағыттар бойынша ақпарат тыңдалды. Атап айтқанда, аудандық маңызы бар автомобиль жолдары мен елді мекен ішіндегі көшелерді қысқы күтіп-ұстау, өткен жылғы әлеуметтік-экономикалық даму нәтижелері, тұрғындар арасында туберкулездің алдын алу шаралары және атаулы әлеуметтік көмектің көрсетілу барысы талқыланды.
Бородулиха ауданының 2025 жылға арналған бюджетін атқару қорытындылары туралы қаржы бөлімінің басшысы Юлия Сутормина есеп берді. Оның мәлімдеуінше, 2025 жылы ауданның бюджеттік көрсеткіштері жақсы орындалған. Жоспар бойынша 7 миллиард 303,5 миллион теңге түсімдер жоспарланған болса, нақты 7 миллиард 469,7 миллион теңге түсті, бұл 102,3%-ды құрайды. Әлеуметтік салық және жеке табыс салығы бойынша орындалмаған сома болса да, жергілікті бюджет кірістері 116,2%-ға орындалыпты. Қаржы игерудің нәтижелері де оң болғанымен, бірқатар жобалардың кеш аяқталуына байланысты 155,4 миллион теңге қаражат игерілмеген. Қаржы бөлімінің басшысы алдағы уақытта бюджетті тиімді игеру үшін арнайы шаралар қабылданатынын айтты.
ТҮКШ, жолаушылар көлігі және автомобиль жолдары бөлімінің маманы Әсел Асанова 2025 жылы аудандық маңызы бар автомобиль жолдары мен кентішілік жолдардың қысқы күтіп-ұстау жұмыстарын қорытындылады. Ауданда жалпы 718 км автомобиль жолы бар, оның ішінде республикалық маңызы бар 96 км, облыстық маңызы бар 285 км және аудандық маңызы бар 337 км жол қысқы күтіп-ұстауға енгізілген. Бұл жұмыстарға 81,2 миллион теңге бөлініп, арнайы техникалар мен инертті материалдар дайындалған.
Экономика және бюджеттік жоспарлау бөлімінің басшысының міндетін атқарушы Юлия Боркова 2025 жылғы әлеуметтік-экономикалық даму қорытындыларын баяндап, өнеркәсіп өндірісінің көлемі 36,1%-ға артып, 90 090,5 миллион теңгені құрағанын хабарлады. Өңдеу өнеркәсібі 150,4%-ға артты. Ауыл шаруашылығында жалпы өнім 99 473,1 миллион теңгені құрап, жоспардан 3,4%-ға асып түсті. Бірақ, өсімдік шаруашылығындағы өнімділік төмендеп, жоспар орындалмағаны атап өтілді. Құрылыс саласында жақсы нәтижелер тіркеліп, 6 221 шаршы метр тұрғын үй пайдалануға берілді. Әлеуметтік қолдау мақсатында 44 пәтер сатып алынды. Шағын және орта бизнес субъектілерінің саны қысқарғанымен, жалпы сауда айналымы 108,9%-ға орындалып, өткен жылмен салыстырғанда 19,3%-ға өсті.
Санитарлық-эпидемиологиялық бақылау басқармасының басшысы Разия Жамурзаева 2025 жылы Бородулиха ауданында туберкулезбен сырқаттанушылықтың өсімі байқалғанын атап өтті. 17 жаңа жағдай тіркеліп, олардың 16-сы тыныс алу ағзаларында болған. Балалар арасындағы сырқаттанушылықтың өсуі алаңдатып отыр. Флюорографиядан өтпеген тұрғындар мен балаларды тексеру жұмыстары күшейтіліп, туберкулезден болатын өлім-жітімнің алдын алу үшін профилактикалық шаралар қолға алынады.
Жұмыспен қамту және әлеуметтік бағдарламалар бөлімінің басшысы Еркежан Маутқазинова 2025 жылы аудан тұрғындарына көрсетілген атаулы әлеуметтік көмек туралы есеп берді. Бағдарламаның мақсаттары мен нәтижелері талқыланып, тұрғындардың әл-ауқатын арттыру үшін атқарылған шаралар сараланды.
2025 жыл Бородулиха ауданы үшін өнеркәсіп, құрылыс және тұрғын үй құрылысы салаларында айтарлықтай даму байқалғанымен, ауыл шаруашылығы мен инвестициялар бойынша бірқатар мәселелер туындады. Алдағы уақытта бұл мәселелерді шешу, әлеуметтік қолдау мен туберкулезбен күресті күшейту басты бағыттар болып табылады.
Әкімдік тарапынан тапсырмалар мен міндеттер нақты белгіленіп, барлық бөлім басшыларына осы бағытта тиімді шаралар қабылдау тапсырылды. Ағымдағы жылға қарағанда алдағы жылы көрсеткіштерді арттыру және бюджетті тиімді игеру басты мақсат ретінде қойылды. Әрбір тапсырма қатаң бақылауға алынып, олардың орындалуы үнемі қадағаланып отырады.
2026 жылы ауданның әлеуметтік-экономикалық жағдайын жақсарту үшін барлық бағытта жүйелі жұмыстар жүргізіледі. Сонымен қатар, тұрғындардың әл-ауқатын арттыру мен денсаулығын сақтау мақсатында қосымша шаралар қабылданады.
Ш.ДОСКЕЕВА,
«Жаңа уақыт»