Бородулиха ауданының әкімі Айдар Ибраев жұмыс сапарымен бірнеше ауылдық округтерді аралап, әлеуметтік нысандардың жағдайымен және атқарылып жатқан жұмыстардың барысымен танысты.
Алдымен Берёзовка ауылына барған аудан басшысы жөндеуден өткен ауыл клубының жұмысын көріп, мәдениет ошағы ауыл тұрғындарының бос уақытын тиімді өткізуіне мүмкіндік беретінін атап өтті. Сондай-ақ жаңа балалар ойын алаңы мен спорттық жабдықтардың жай-күйімен танысып, игі іске қолдау көрсеткен кәсіпкерге алғысын білдірді. Жергілікті тұрғындар да балаларға арналған алаңның ашылуына ризашылықтарын жеткізді.
Сапар Ивановка ауылында жалғасып, мұнда екі пәтерлі тұрғын үйлердің құрылысы тексерілді. Бұл баспана кезегінде тұрған азаматтар үшін үлкен қолдау болмақ. Сонымен қатар мектеп пен шағын орталықтағы қазандықтың қысқы маусымға дайындығы, асхананың тағам сапасы мен бағасы қаралды. Әкім тұрғындардың ұсыныстарын тыңдап, оларды болашақта ескерілетінін айтты.
Переменовка ауылдық округінде «Су құбыры желілерін салу» жобасының орындалу барысы қаралды. Бүгінге дейін 22 шақырымдық желінің 6 шақырымы ғана тартылған. Әкім мердігермен кездесіп, жұмысты жеделдету және кедергілерді еңсеру жолдарын талқылады. Жобаны уақытында аяқтау – негізгі міндет болып қала бермек.
Жезкент кентіне сапар барысында аудан басшысы шекара маңындағы бейтарап жолдың жағдайын қарады. Қыс мезгілінде бұл аймақтың қар басып қалуы жүргізушілерге қиындық туғызатынын атап өтті. Жолды көтеріп, қиыршық тас төсеген кәсіпкерге ризашылық білдірілді, алайда қысқа дейін қосымша жұмыстарды жүргізу қажеттігі айтылды. Сонымен қатар, кент ішіндегі көшелерге асфальт төсеу жоспарлары да қаралды.
Әкім Жезкенттегі ауруханаға барып, тұрғындарды алаңдатқан мәселе – тәулік бойғы стационардың жабылуын талқылады. Денсаулық сақтау басқармасы өкілдері алдағы уақытта стационардың қайта ашылатынын хабарлады. Бұдан бөлек, «Күншуақ» және «Тополек» балабақшаларындағы жөндеу жұмыстары қаралды. Жаңа ойын алаңдарын орнату, жылыту жүйесін жаңарту және мемлекеттік тілде қосымша топ ашу мүмкіндігі талқыланды.Балалар паркін аралаған аудан басшысы ескі субұрқақты жаңарту және абаттандыру жұмыстарын жандандыруды тапсырды.
Сондай-ақ орталық аудандық аурухана мен әлеуметтік қызмет көрсету орталығындағы қысқы маусымға дайындық жұмыстары тексерілді. Островский атындағы орта мектептің асханасында тағам сапасы мен бағасы мәселесі қаралды. Әкім әрбір балаға мектеп асханасының қызметін толық әрі қолжетімді ету қажеттігін атап өтті.
Аудан әкімі А. Ибраевтың бұл сапары тексеріс қана емес, тұрғындардың ұсыныстарын тыңдап, өзекті мәселелерді дер кезінде анықтауға бағытталды. Әкім атап өткендей, аудан жұмысының басты мақсаты – тұрғындардың әл-ауқатын арттыру және өңірдің тұрақты дамуын қамтамасыз ету.
“ЖУ” ақпарат
