Абай облысына жұмыс сапарымен Татарстан Республикасы Премьер-Министрінің орынбасары – Ауыл шаруашылығы және азық-түлік министрі Марат Зяббаров бастаған делегация келді.
Делегация жұмыс сапары барысында Семей қаласы мен Бородулиха, Бесқарағай аудандарындағы шаруа қожалықтары мен ауыл шаруашылығы өнімдерін өңдеумен айналысатын кәсіпорындарда болып, жұмыс барысымен танысты.
Бородулиха ауданында орналасқан «Лазарев и К» мен «Зенковское» серіктестіктерінде болды. «Лазарев и К» ЖШС қазақтың ақбас тұқымды ірі қара малын өсірумен айналысады. Мал тұқымын жақсарту бағытында селекциялық қызмет атқарады. Жетістіктерінің бірі — аналық малдың «Элита рекорды» санатын алуы. Кәсіпорында күнбағыс тұқымын қайта өңдеу бойынша экстракциялық желісі (қуаттылығы 12,5 мың тонна), сондай-ақ ара өсіру бойынша асыл тұқымды шаруашылық мәртебесі бар.
Ал «Зенковское» ЖШС дәнді, дәнді-бұршақты және майлы дақылдарды және ірі қара мал өсірумен айналысады. Шаруа қожалығы қазақтың ақбас тұқымды бұқаларын қолдана отырып, ірі қара малдың селекциялық-асыл тұқымдық жұмысын жүргізеді.
Меймандар шаруашылықты аралап, жұмыс барысымен танысты.
— Шаруашылықты автоматтандыру, цифрландыру және мал басын қатаң есепке алу — бүгінде қалыптасқан үрдіс қана емес, қажеттілік. Бұл бордақылауды қадағалаудың тиімділігін арттырып қана қоймай, ветеринарлық қауіпсіздік тұрғысында да маңызды рөл атқарады. Біздің бағытымыз бір, тәжірибе алмасу, серіктестік, жаңа технологияларды енгізу — сүт және ет шаруашылығы дамуының кепілі. Ет нарығына сұраныс жоғарылап келеді, біз мұны қолдап, бірлескен жобалар мен инновациялық тәсілдер арқылы ары қарай дамытуымыз қажет, — деді Татарстан Республикасы Премьер-Министрінің орынбасары — Ауыл шаруашылығы және азық-түлік министрі Марат Зяббаров.
Осы күні облыс әкімі Нұрлан Ұранхаев татарстандық делегация өкілдерімен кездесу өткізді. Делегация құрамында Марат Зяббаровпен бірге министрлік өкілдері, республиканың жетекші қайта өңдеу кәсіпорындарының басшылары, ауылдық кооперацияны дамыту жөніндегі мамандар мен ауыл шаруашылығы кәсіпкерлері де болды.
Ай-Керім СӘРСЕНҚАЛИ,
«Жаңа уақыт» 
