Дмитриевка ауылында аға буынның шығармашылыққа құштар тұрғындарын біріктірген ерекше музыкалық байқау өтті. Бұл шара ауыл өміріне сән мен серпін қосып қана қоймай, үлкендердің өнерге деген ықыласын, жастық жігерін тағы бір мәрте дәлелдеді.
Музыкалық байқауға Новодворовка ауылынан келген «Әжелер» ансамблі мен Дмитриевканың «Жақсы көңіл-күй» тобы қатысып, өз өнерлерін ортаға салды. Әр топ ұлттық әндер мен сүйікті халық әуендерін орындап, көпшіліктің ыстық ықыласына бөленді.
Іс-шараның құрметті қонақтары – Сергей Лазурин, Рыскүл Атаева, Александра Шпилькина, Новодворовка ауылдық округінің өкілдері және ауыл тұрғындары болды. Көрермендер үлкендер орындаған әндердің шынайылығы мен жүректен шыққан өнерін жоғары бағалады.
Мерекелік бағдарлама ерекше жылы, қуанышты атмосферада өтті. Сахнаға шыққан әрбір қатысушы көрермендерді өз позитивімен, жастық жігерімен жігерлендірді. Байқау соңында өнерпаздар грамоталармен және 50 мың теңгенің сертификаттарымен марапатталды. Бұл марапат – тек өнерге деген құрмет қана емес, үлкендердің шығармашылық белсенділігін ынталандырудың бір көрінісі.
Іс-шараны ұйымдастырған аудандық ардагерлер кеңесі ауыл кәсіпкерлері мен демеушілерге көрсеткен қолдаулары үшін алғыстарын білдірді. Әлеуметтік серіктестік ауылда мәдени өмірдің дамуына жол ашып, ардагерлердің белсенді демалысын қолдауға үлкен үлес қосып келеді.
Мұндай бастамалар ауылдағы шығармашылық ортаны қалыптастырып, ұрпақтар сабақтастығын нығайтады. Ең бастысы – жасқа қарамай, өнерге, белсенді өмірге құлшыныс танытудың мүмкін екенін дәлелдейді. Дмитриевкадағы бұл музыкалық кеш – аға буынға көрсетілген құрметтің, ауыл бірлігінің және мейірімнің жарқын көрінісі болды.
А.НЕСІПБАЕВА
