Бородулиха ауданының Дмитриевка ауылында жаңа өрт сөндіру пункті ашылды. Маңызды нысан «ВостокЛесИндустрия» ЖШС базасында орналастырылып, оның директоры Гилани Сайдулаев бекеттің ашылуына тікелей қолдау көрсетті.
Салтанатты рәсімге ҚР ТЖМ Төтенше жағдайлар комитеті төрағасының орынбасары Руслан Қайрақбаев, Абай облысы әкімінің орынбасары Серік Төленбергенов, ТЖД бастығы Манарбек Шапағатов, Бородулиха ауданының әкімі Айдар Ибраев, аудандық ТЖ қызметінің басшысы Ержан Сүлейменов және жергілікті тұрғындар қатысты.
Жаңа бекет Дмитриевка және Боровое ауылдарын қамтитын аумаққа қызмет көрсетеді. Бұл аймақта 1151 тұрғын, 358 үй және әлеуметтік нысандар орналасқан. Реликті қарағайлы орман алқабының жақын орналасуына байланысты, өртке жедел әрекет ету – бекет жұмысының басты міндеттерінің бірі.
Пункт толыққанды тәулік бойы қызмет етуге дайын: қызметкерлерге арналған жеке бөлме, екі кереует, ас үй жиһазы, санитарлық торап орнатылған. Мұндай жағдайлар өрт сөндірушілердің жедел шығып, елді мекендерде, дала мен орман алқаптарында туындайтын өрттерді тиімді сөндіруіне мүмкіндік береді.
Абай облысы әкімінің орынбасары Серік Төленбергенов өз сөзінде жаңа бекеттің ашылуы өңірде жүргізіліп жатқан жүйелі жұмыстың бір бөлігі екенін атап өтті:
— «Бүгінде Абай облысында 72 өрт сөндіру пункті жұмыс істейді, оның тоғызы биыл ашылды. Олар 94 мыңнан астам халқы бар 165 елді мекенді қамтиды. Бұл – біздің бөлімшелердің дайындығын күшейтуге және қызмет сапасын арттыруға бағытталған жоспарлы жұмыс. Ең бастысы – бекеттер шынымен қажет аумақтарда, елді мекендер мен табиғи нысандарға жақын жерде ашылып отыр», — деді ол.
Сондай-ақ ол «ВостокЛесИндустрия» ЖШС директоры Гилани Сайдулаевқа өрт сөндіру бекетін орналастыруға көрсеткен қолдауы үшін алғысын білдірді.
Комитет төрағасының орынбасары Руслан Қайрақбаев та құттықтау сөз сөйлеп, ауылдық аумақтарда өрттің алдын алу шараларын күшейту, жергілікті қызметтердің дайындығын арттыру және өрт сөндіру бекеттері желісін кеңейтудің маңызды екенін айтты. Оның айтуынша, мемлекеттік органдар, жергілікті атқарушы билік және бизнес арасындағы тығыз ынтымақтастық тұрғындардың қауіпсіздігін қамтамасыз етуде айрықша рөл атқарады.
2025 жылы осыған ұқсас өрт сөндіру пункттері Зенковка, Петропавловка және Михайличенково ауылдарында іске қосылған болатын. Дмитриевкадағы жаңа нысан – ауданның өрт қауіпсіздігі жүйесін одан әрі нығайтатын төртінші бекет. Ол төтенше жағдай кезіндегі әрекет ету уақытын айтарлықтай қысқартады.
Салтанатты ашылудан кейін қатысушылар бекет ішін аралап көрді: қызметкерлердің демалыс бөлмесі, ас үй аймағы, санитарлық торап және өрт техникасы таныстырылды. Облыс пен аудан өкілдері жергілікті тұрғындармен кездесіп, қауіпсіздік мәселелерін талқылап, ауылдағы өрттің алдын алу шараларын жетілдіру бойынша ұсыныстарды тыңдады.
Дмитриевкада жаңа өрт сөндіру бекетінің ашылуы – аудан тұрғындарының қауіпсіздігін күшейтуге бағытталған маңызды қадам. Бекеттің іске қосылуы орман алқабы мен елді мекендерді қорғауды жақсартуға, ал төтенше жағдай кезінде өрт сөндірушілердің әрекет ету жылдамдығын арттыруға мүмкіндік береді.
Ш.ДОСКЕЕВА
