Қоғамдағы сұранысқа ие мамандықтардың көшін бастап тұрған ақ халатты абзал жандар. Күндіз-түні тынбай еңбек етіп, халықтың алғысына бөленіп жүрген медицина қызметкерінен артық мамандық әлемде жоқ шығар.
Медицина қызметкерлері күніне орай Бородулиха ауданының мәдениет үйінде үлкен салтанатты іс-шара өтті.
Аудан әкімі Айдар Ибраев медицина қызметкерлерін кәсіби мерекелерімен құттықтап, сала үздіктерін марапаттады. Өңірдегі медицина саласының өркендеуіне үлес қосқан дәрігерлерді ғана емес, нақты істерді де атап өтті.
— Бүгінде ауданның денсаулық саласы алға қадам басуда. “Ауылда денсаулық сақтауды жаңғырту” жалпыұлттық жобасы аясында құны 836 миллион теңгені құрайтын үш маңызды жоба жүзеге асырылды: Успен ауылында медициналық пункт, Ауыл ауылында фельдшерлік-акушерлік пункт, Новая Шульба ауылында дәрігерлік амбулатория пайдалануға берілді. «Ауыл – ел бесігі» бағдарламасы бойынша төрт ауылда – Бел-Ағаш, Зенковка, Новопокровка, Петропавловкада күрделі жөндеу жұмыстары басталды. Төтенше жағдайларда электр қуатынсыз қалмауы үшін ауруханаға қуатты резервтік қуат көзі – дизельдік электр станциясы орнатылды. «Салауатты ұлт» бағдарламасы аясында жаңа, заманауи құрал-жабдықтар әкелінді.
Іс-шара аясында үздік шыққан қызметкерлерді марапаттау рәсімі өтті. Атап айтқанда, облыстық денсаулық сақтау басқармасының Құрмет грамоталарымен Марьям Конарбаева (Зенковка), Наталья Кучерук (Песчанка), Роза Қасымжанова (Петропавловка), Жанар Амирбекова (аудандық аурухана), Салиха Сәрсембаева (Жезкент) марапатталса, аудан әкімінің грамотасы Айсара Қожабаева, Любовь Будник, Қамажай Асанова, Алена Масловская, Любовь Никитина, Ернат Қабдрахманов, Нұргүл Юсупова, Светлана Богданова, Галина Цыганок, Ольга Понамаренко, Алена Громова, Татьяна Скоробогатоваға берілді. Сондай-ақ, Самал Жүнісова, Айнагүл Жалбина, Раушан Қыдыралина, Жұлдыз Макажанова, Светлана Сагидхаджиева, Наталья Аукенова, Ақмарал Жанкенова, Андрей Кириловский, Виктория Алеева, Надежда Полыгалова, Марина Стукаленко Алғыс хаттармен марапатталды.
Мерекелік іс-шара барысында аудан өнерпаздарының қатысуымен концерттік бағдарлама ұсынылып, әсем әндер орындалды.
Денсаулық – әр адамның ең басты байлығы, ал осы байлықты сақтау жолында аянбай еңбек етіп келе жатқан ақ халатты жандардың жұмысы мәртебелі болып қала беретіндігі сөзсіз.
Ш. ДОСКЕЕВА,
«Жаңа уақыт»
