Бородулиха ауданында Бородулиха – Успенка – Пол-Лог жолы жөнделуде. Бұл маңызды инфрақұрылымдық жоба Қазақстан Республикасының Президенті Қасым-Жомарт Тоқаевтың тапсырмасымен және Абай облысының әкімі Берік Уәлидің қолдауымен жүзеге асырылуда. Жоба республикалық және облыстық бюджет қаражаттары есебінен қаржыландырылып, жолдың орташа жөндеуі жүргізілуде. Жол учаскесінің жалпы ұзындығы – 8 км, оның ішінде 5,5–13,5 км аралығы жөнделіп жатыр.
Жобаның жалпы құны – 788 092,1 мың теңге, жөндеу жұмыстарын «ДСУ-14» ЖШС жүргізуде. Жөндеу жұмыстарын 2025 жылдың қазан айына дейін аяқтау жоспарланған.
Жоба аясында жолдың жамылғысы асфальтобетонмен жаңартылады. Бұл өзгеріс жолдың жайлылығын, қауіпсіздігін және ұзақ мерзімділігін арттырады. Қазіргі таңда жолдың алғашқы тегістеу қабатының 2 шақырымы төселген.
Мердігер ұйым өкілі:
– «Барлық жұмыстар қатаң түрде бекітілген кесте мен сапа стандарттарына сәйкес жүргізілуде. Біз заманауи материалдар мен технологияларды қолданамыз, бұл жолдың ұзақ жылдар бойы қызмет етуіне және аудан тұрғындарына ыңғайлы болуына мүмкіндік береді», — деп атап өтті.
Бородулиха ауданының әкімі Айдар Ибраев:
– «Бұл жол жөндеудің Успенка, Жерновка және Пол-Лог ауылдарының тұрғындары үшін маңызы зор. Аталған ауылдарда 872-ден астам адам тұрады. Жаңартылған жол бөлімі ыңғайлы қатынасты қамтамасыз етіп, қозғалыс қауіпсіздігін арттырады», — деді.
Успенка ауылының тұрғындары жолдың жаңаруын қуанышпен қарсы алуда. Ауылда 30 жылдан астам уақыт тұрып жатқан Надежда Другова:
– «Осы уақытқа дейін жақсы жол болмаған еді – жабындысы үнемі бұзылып, жаңбырдан кейін жүру қиын болатын. Қазір жөндеу жұмыстары басталды, жұмысшылар өте жақсы жұмыс істеп жатыр. Біз риза болып отырмыз. Әсіресе, өз отбасым мен жақын көршілерімнің атынан айтсам – бәрі қуанышты. Жолды сапалы әрі тез жасап жатыр», – деп бөлісті.
2025 жылы Бородулиха ауданында жалпы ұзындығы 18 км болатын аудандық жолдарды жөндеу жоспарлануда. Бұл жұмыстар ауданның инфрақұрылымын жақсартуға бағытталған маңызды қадам болып табылады.
Бородулиха ауданы әкімінің
баспасөз қызметі