Бородулиха аудандық қоғамдық орталығында жыл сайынғы маңызды шаралардың біріне айналған «Біз біргеміз» жастар форумы ұйымдастырылды. Бұл басқосу – аудан жастарының бір жылдағы ең үлкен жетістіктерін саралайтын, жаңа идеялар мен тың бастамалардың тұсауы кесілетін тағылымды алаңға айналды. Форумға мектеп оқушылары, колледж студенттері, жас мамандар, белсенді еріктілер, қоғамдық ұйымдардың өкілдері және жастар саясатын дамытуға үлес қосып жүрген меценаттар қатысты.
Форумның шымылдығын Бородулиха ауданы әкімінің орынбасары Қайрат Сапоров ашты. Ол өзінің құттықтау сөзінде ауданның дамуында жастардың айрықша рөл атқаратынын атап өтіп:
— «Мұндай кездесулер – тек есеп беру немесе марапаттау үшін емес, диалог пен ынтымақтастықтың алаңы. Бүгінгі жастардың білімі, белсенділігі мен азаматтық позициясы ауданымыздың болашақ дамуының тірегі», — деді.
Сонымен қатар форумның «Біз біргеміз» деп аталуы бірлік, жауапкершілік және ортақ мақсатқа жұмылудың символы екенін ерекше атап өтті.
Жиын барысында қоғамдық өмірге белсене араласып, әлеуметтік, шығармашылық, спорттық және еріктілік бағыттарда үздік шыққан жас азаматтар аудан басшысының алғыс хаттарымен марапатталды.
Іс-шара барысында қоғамдық, әлеуметтік, кәсіби және еріктілік қызметте ерекше көзге түскен ауданның жас тұрғындары марапатталды.
Жастар бастамаларын қолдап, мәдени іс-шараларды ұйымдастыруға қосқан үлесі үшін Камила Нықишева, белсенділігі мен бокстан жеткен жетістіктері үшін, Островский мектебінің оқушысы — Қажет Рахат; адал еңбегі мен жоғары жауапкершілігі үшін амбулатория медбикесі — Денис Попандопуло; қарттар мен аз қамтылған азаматтарға тұрақты қайырымдылық көмегі үшін «Буркотовское» ЖШС директоры — Владимир Шеслер, алғыс хаттармен марапатталды.
Сонымен қатар еріктілер және ауданның қоғамдық өміріне белсене қатысушылар Арина Аркуша, Валерий Здержиков, Алина Райханова, Кира Другова, Анастасия Ломова, Анастасия Мецкер, Светлана Терещенко да марапат төрінен көрінді.
Аудан жастарына үнемі қолдау көрсетіп жүрген кәсіпкерлер мен серіктестердің
еңбегі де назардан тыс қалмады. Атап айтқанда: «ВостокЛесИндустрия» ЖШС директоры Гилани Сайдулаев, «Зенковское» ЖШС басшысы Мадижан Қурамысов, «Раушан» шаруа қожалығының жетекшісі Талғат Оразаев, «Agro Unity» ЖШС директоры Денис Подкорытовқа жастарды қолдауға қосқан үлестері үшін алғыс білдірілді.
Форумның ең әсерлі сәттерінің бірі – жыл бойы ерекше жобаларымен көзге түскен «Жылдың жастар бастамасы – 2025» аймақтық байқауының жеңімпаздарын марапаттау рәсімі болды.
Марапаттар келесі номинациялар бойынша табысталды: «Жыл белсендісі» аталымында Красноярск мектебінің мұғалімі әрі көшбасшысы Владимир Скоробогатов, «Жылдың әлеуметтік жобасы» номинациясында Новопокровка мектебінің тарих пәні мұғалімі Ернұр Кубенов, «Жылдың медиа бастамасы» бойынша Балаларды қолдау орталығының мұғалімі, позитивті медиа-контент авторы Валентина Асовбаева, ал «Жас отбасы» аталымында Петровпавловка ауылынан Помельниковтар отбасы еңбекқорлық пен бірліктің жарқын үлгісі ретінде жеңімпаз атанды.
Форум қонақтарының ең үлкен қызығушылық тудырған бөлімі – жасанды интеллект технологияларын пайдаланып жасалған «Boro Youth AI», шығармашылық жұмыстар көрмесі болды. Оқушылар мен студенттер AI арқылы болашақ ауыл бейнесін, еріктілік қозғалысының жаңа моделдерін, әлеуметтік жобалардың ықпалын көрсететін тың жұмыстарын ұсынды. Бұл бөлім жастардың технологияны меңгерудегі ізденісі мен креативтілігін айқын көрсетті.
«Біз біргеміз» жастар форумы тағы бір мәрте Бородулиха жастарының басты күші – бірлікте, ынтымақтастықта және туған жерге деген жауапкершілікте екенін айғақтады.
Жастардің тың идеялары, белсенді азаматтық позициясы және қоғамдық өмірге жанашырлығы – ауданның ертеңіне деген сенімді күшейтеді.
Бородулиха жастары өз болашақтарын өздері жаңашылдықпен, біліммен және ортақ мақсат жолындағы бірлікпен қалыптастыруда.
Ш. ДОСКЕЕВА,
«Жаңа уақыт»
