Ұлтаралық қатынастың жақсы жолға қойылуы, халықтар достығының нығаюы үлкен маңызға ие. Тұрақтылық пен ұлттар арасындағы татулық, бірлік – біздің ең маңызды байлығымыз саналады. Қазақстан халқының бірлігі күнін көп ұлтты Бородулиха ауданы кең көлемде атап өтті.
Еліміздегі 130-дан аса этнос тату-тәтті ғұмыр кешіп, ұрпақ өсіріп, салт-дәстүрін дәріптеп отыр. Аудандық Достық үйі мен Бородулиха колледжінің ұжымы бірлесіп ұйымдастарған этноfest шарасында «Лайсан», «Верасы», «Смерічка», «Возрождение» этномәдени бірлестіктерінің жастары мен студенттер өз халықтарының мәдени мұрасын насихаттады.
«Мәңгілік Ел» тәрбие-білім беру орталығы «Рухани жаңғыру» бағдарламасы аясында 7-8 сынып оқушылары арасында «Қазақстан – біздің ортақ үйіміз» атты зияткерлік ойынын ұйымдастырды. Зияткерлік сайыста Жезкент кенті мектеп-лицейінің командасы бірінші орын алса, Владимир Комаров атындағы орта мектебінің оқушылары екінші, Жезкент орта мектебінің оқушылары үшінші орынды иеленді.
Мерекеге орай Жезкент Мәдениет үйінің мұрындық болуымен «Бір шаңырақ астында» байқауы өтіп, кенттегі мекемелер мен ұжымдар шығармашылық ізденістерін сынға салды. Қорытындысында Жезкент кенттік амбулаториясының ұжымы «Үздік ұжым — 2024» номинациясына ие болса, Жезкент мектеп-лицейі «Ең креативті ұжым — 2024» атанды. «Солнышко» балабақшасы «Ең тату ұжым — 2024», Жезкент орта мектебі «Ең шығармашыл ұжым — 2024» номинациясын иеленді.
Андреев ауылдық округінде «Бірлігіміз жарасқан» атты дөңгелек үстел, Петропавл ауылдық кітапханасында тәрбие сағаты өтті. Сонымен бірге, Песчан, Красноярск ауылдық кітапханаларында дөңгелек үстел ұйымдастырылды. Бұл шараларға халықтар достығы, ел бірлігі, қоғам тұтастығы арқау болды. Красноярск ауылдық кітапханасының кітапханашысы Н.Леонтьева «Күшіміз – бірлікте» атты тақырыптық әңгіме өткізіп, қатысушыларды елімізді мекен еткен ұлттардың мәдениетіне, дәстүрлері мен әдет-ғұрыптарына құрметпен қарауға шақырып, өскелең ұрпақ бойында патриоттық сезім ұялатуға тырысты.
Бородулиха ауылдық округінде әкімдік пен Аналар кеңесінің өкілдері тыл еңбеккерлері – Маргарита Апалосовна мен Ираида Шуклинаны құттықтап, ауданның дамуына қосқан үлестері үшін алғыстарын білдірді.
Осылайша, аудан тұрғындары мерекелік шаралар барысында бірлігі мен берекесін тағы бір байқатты.
Айкөркем МАҚЫШ,
«Жаңа уақыт»
