Бородулиха – көп ұлтты аудан. Түрі мен түсіне, тілі мен дініне қарамастан түрлі ұлт пен ұлыс өкілі тату-тәтті өмір сүріп жатқан қасиетті мекен.
Жуырда Абай облысының әкімі Берік Уәлидің төрағалығымен Қазақстан халқы Ассамблеясының 30 жылдығына арналған кеңейтілген кеңес өтті. Кеңеске өңірдегі этномәдени бірлестіктердің жетекшілері, қоғамдық институттардың өкілдері, ардагерлер мен мәслихат депутаттары қатысты.
Шарада сөз сөйлеген облыс әкімі Берік Уәли Қазақстан халқы Ассамблеясының еліміздегі бейбітшілік пен тұрақтылықты қамтамасыз етудегі маңызды рөліне тоқталып, оның қоғамдағы орны мен маңызын ерекше атап өтті.
– Мемлекет басшысы Қасым-Жомарт Кемелұлы Тоқаевтың қоғамдық-саяси реформалары бұл институттың жұмысына жаңа серпін берді. Қазақстан халқы Ассамблеясының ХХХІІ сессиясында Президентіміз: «Ынтымағы бекем жұрттың болашағы баянды болады. Ел бірлігін нығайту және Отанымызды өркендету – қасиетті парыз», – деп нақты міндет жүктеді. Бұл – баршамыз үшін ортақ тарихи жауапкершілік. Ел ішіндегі бірлік пен келісімді сақтау – әрбір азаматтың міндеті. Ассамблея – сенім мен өзара құрметтің, татулық пен тұрақтылықтың жарқын үлгісі. Этностардың мәдениеті мен салт-дәстүрін сақтай отырып, бізді біріктіретін – бір мүдде мен орта болашақ, – деді аймақ басшысы.
Кеңес барысында облыс әкімі Мемлекет басшысының бастамасымен Абай Құнанбайұлының 180 жылдығына орай «Абайға құрмет» республикалық акциясының басталғанын хабарлады. Бұл игі бастама аясында еліміздің барлық облыстары өңірімізге тарту жасауда. Солардың бірі – Маңғыстау облысы. Облыс әкімдігінің қолдауымен Маңғыстау өңірі Семей қаласында жаңа Достық үйінің құрылысын қолға алмақ.
– Бұл бастама – еліміздегі ішкі бірліктің, өңіраралық ынтымақтастық пен өзара қолдаудың нақты көрінісі. Татулық пен келісімді басты құндылық санайтын мемлекетіміз үшін бұл аса маңызды әрі қуанышты жаңалық. Президентімізге, Үкіметке және Маңғыстау облысының әкімдігіне шынайы алғысымызды білдіреміз, – деді Берік Уәли.
Айта кетейік, бүгінгі таңда облыс аумағында 5 Достық үйі мен 46 этномәдени бірлестік жұмыс істеп тұр. Түрлі этнос өкілдерін бір шаңырақ астына топтасытып, бір мақсат, бір мүддеге жұмылдырып отырған мекемелердің бірі – Бородулиха аудандық Достық үйі.
Мұнда қазақ мәдени бірлестігімен қатар, татар, украин, беларус және екі орыс этномәдени бірлестігі белсенді жұмыс істеп отыр. Сонымен қатар, аудан аумағында неміс және татар қоғамдық бірлестіктерінің филиалдары қызмет етеді. Азаматтық бірлікті нығайту мен дәстүрлерді сақтау жолында Ақсақалдар кеңесі мен Аналар кеңесі, «Ассамблея жастары» жастар қозғалысы мен волонтерлік қозғалыс орталығы маңызды рөл атқарады.
Кеңес аясында Қазақстан халқы Ассамблеясының 30 жылдық мерейтойына орай ел бірлігі мен қоғамдық келісімді нығайтуға үлес қосқан бірқатар этномәдени бірлестік жетекшілері, қоғамдық институт мүшелері, діни қызметкерлер, мәслихат депутаттары мен еңбек ардагерлері арнайы «Қазақстан халқы Ассамблеясына 30 жыл» мерекелік медалімен марапатталды. Марапат иелері қатарында – татар этномәдени бірлестігінің жетекшісі Наиля Агзамовна Давлетшина («Ляйсан»), орыс этномәдени бірлестігінің жетекшісі Ольга Карловна Степанова («Родник»), Достық үйінің директоры Александра Александровна Шпилькина және «Ассамблея жастары» жастар қозғалысының көшбасшысы Виктория Анатольевна Мокроусова бар.
Қазақтың кең пейілі, тарихи төзімі мен ұлтаралық татулық негізінде Тәуелсіз Қазақстанда саяси тұрақтылық берік орнықты. Біздің бұл өнегемізді әлемнің аса беделді сарапшылары мен халықаралық ұйымдары бірауыздан әлем халықтарына үлгі боларлық басты жетістігіміз деп мойындады. Татулық пен бірлік басты байлығымыз болып қала бермек.
Ай-Керім СӘРСЕНҚАЛИ,
«Жаңа уақыт»
