“Адамға ең бірінші білім емес, тәрбие берілуі керек, тәрбиесіз берілген білім адамзаттың – қас жауы”, – дейді әл – Фараби. Қазіргі заман бала тәрбиесіне ерекше мән беруді қажет етеді. Себебі, ұрпақ тәрбиесі – ұлт болашағы. Ұлтты сақтау үшін қызды, рухты сақтау үшін ұлды тәрбиелеу қажеттігі ықылым заманнан келе жатқан қағида.
Жуырда Бородулиха ауданы әкімдігінің жанындағы құқық бұзушылықтардың алдын алу жөніндегі ведомствоаралық комиссияның отырысы өтті. Отырыста қаралған мәселелердің бірі — кәмелетке толмағандарды рухани-адамгершілік тәрбиелеу бойынша білім беру мекемелерінде қабылдарған шаралар және оқушылардың жазғы демалысын ұйымдастыру мәселесі. Тақырып бойынша Бородулиха ауданының білім беру бөлімі басшысының міндетін атқарушы Н.Масғұт баяндады.
-Тәрбие жұмысы қазақ халқының жалпыадамзаттық және ұлттық құндылықтары негізінде адал, еңбекқор, саналы, жасампаз азаматты тәрбиелеуге негізделген бірыңғай тәрбие бағдарламасы негізінде жүзеге асырылады. Ұлттық мүдделерді ұлықтаған, ар-ожданын сақтаған, жауапкершілігі жоғары, білімді де саналы ұрпақ тәрбиелеу – негізгі мақсатымыз. Осы мақсатта сабақтан тыс уақытта ұйымдастырылатын тәрбие жұмысының ауқымы кең,- деді Н.Масғұт.
Ауданның бас ұстазының айтуынша, ағымдағы оқу жылында тәрбие жұмысын ұйымдастыру кезінде айтулы және атаулы күндерге ерекше назар аударылды. Ғұлама Қожа Ахмет Ясауи туғанына 930 жыл толуына, ақын, жазушы, философ, тарихшы және композитор Шәкәрім Құдайбердиевтің туғанына 165 жыл толуына, көрнекті қазақ жазушысы Жүсіпбек Аймауытовтың 135 жылдығына, Алаш қозғалысының қайраткері, ақын, қазақ әдебиетінің жарқын жұлдызы Мағжан Жұмабаевтың туғанына 130 жыл толуына орай, жазушы, ойшыл, демократ Сұлтанмахмұт Торайғыровтың туғанына 130 жыл толуына орай, ақын, жазушы, көрнекті мемлекет және қоғам қайраткері Сәкен Сейфуллиннің туғанына 130 жыл толуына орай аудан мектептерінде ашық диктант, кітаптар көрмесі, тарих сабағы, сынып сағаттары, өзге де мәдени ағарту шаралары ұйымдастырылыпты.
-Оқушылардың рухани-адамгершілік дамуының ажырамас бөлігі – отбасымен тығыз қарым-қатынас. «Мектеп-оқушы-ата-ана» үштігінің байланысын нығайту мақсатында мектеп бойынша және сыныптық ата-аналар комитеттері, ата-аналарды педагогикалық қолдау орталығы жұмыс істейді. Оқушыларға тағылымды тәрбие беру мақсатында «Даналық мектебі», «Аналар кеңесі» жұмысы жанданды. Жыл басынан бері мектептің қамқоршылық кеңесімен бірлесіп 3 отырыс өткізілді,- деді Н.Масғұт.
Оқушылардың бос уақытын тиімді ұйымдастырып, бала бойындағы дарынды ашып, талантын шыңдау да білім беру мекемелері алдындағы үлкен міндет. Білім ошақтарында оқушылардың рухани-адамгершілік, азаматтық-патриоттық, көркемдік-эстетикалық, еңбек және дене тәрбиесін жүзеге асыруды қамтамасыз ету мақсатында сурет, вокал, театр, тоқу, туристік-өлкетану үйірмелері, «Мерген» патриоттық үйірмесі, тіл үйрену үйірмелері және спорттық секциялар жұмыс істейді.
Оқушылардың жазғы демалысы жыл сайын балалар мен жасөспірімдерді сауықтыру, демалыс және жұмыспен қамту бағыттары бойынша ұйымдастырылады.
-Бірінші кезекте аз қамтылған және көп балалы отбасылар санатындағы оқушылардың, ата-анасының қамқорлығынсыз қалған балалардың, жетім балалардың демалысын ұйымдастыру көзделген. 25 маусымда Уба-Форпоставка орта мектебінің «Солнечный» сауықтыру лагерінің алғашқы маусымы басталады. Үш сауықтыру маусымында 180 оқушы демалады. Балалардың жолдамасын төлеуге жергілікті бюджеттен 6240 мың теңге көлемінде қаражат бөлу көзделген,-деді аудандық білім бөлімінің басшысы.
1 маусымда аудан мектептерінде мектепжанындағы жазғы лагерьлер ашылады. 1-30 маусым аралығында аз қамтылған отбасылардың балалары санатындағы 1-4 сыныптарда білім алатын 359 оқушы жанындағы лагерьлерде демалады. Оларға тегін тамақтану ұйымдастыру үшін 2743, 0 теңге бөлініпті.
Әйгерім СӘРСЕНҚАЛИ,
«Жаңа уақыт»