Бородулиха ауданында дәстүрлі тамыз педагогикалық конференциясы өтті. Жыл сайынғы басқосу ұстаздар қауымына жаңа оқу жылына тың серпін беріп, білім беру саласындағы өзекті мәселелерді талқылайтын маңызды алаңға айналды.
Биылғы конференцияның тақырыбы – «Білім келешегі: адал азамат – кәсіби маман». Жиын басталар алдында қонақтар оқушылардың шығармашылық көрмесімен танысты. Көрмеге Абайдың 180 жылдығына арналған суреттер, қолөнер бұйымдары мен ғылыми жобалар қойылып, жас ұрпақтың ізденімпаздығы мен таланты айқын көрінді.
Аудан мектептері жаңа оқу жылына үлкен дайындықпен келді. 23 мектеп Starlink технологиясы арқылы интернетке қосылып, шалғай ауылдарда да жоғары жылдамдықтағы байланыс орнатылды. 6 мектептің жылыту жүйелері жаңғыртылып, барлық білім беру ұйымдары бейнебақылау камералары мен дабыл түймелерімен толық жабдықталды.
Жиын барысында аудан әкімі Айдар Ибраев ұстаздарға арнап сөз сөйлеп, білім сапасын арттыру үшін кешенді шараларды жүзеге асыру қажеттігін атап өтті:
– «Біз сіздерден кәсіби шешімдерді, шығармашылық белсенділікті және тың ізденістерді күтеміз. Әрбір ата-ана өз баласының болашағын сіздерге сеніп тапсырады. Сондықтан оқушылардың жан-жақты дамуы, саналы азамат болып қалыптасуы – ең алдымен сіздердің кәсіби біліктіліктеріңіз бен ұмтылыстарыңызға байланысты. Осы жолда жасап жатқан еңбектеріңіз үшін ризашылығымды білдіремін», – деді ол.
Сонымен қатар, жиын барысында Мемлекет басшысының педагогтердің кәсіби дамуы, білім сапасын арттыру, сондай-ақ жас ұрпақ арасында зиянды құбылыстарға төзбеушілік көзқарасты қалыптастырудың маңыздылығын ерекше атап өткені де айтылды.
Конференция соңында үздік педагогтар мен мектеп қызметкерлері марапатталып, аудандық Мәдениет үйінің өнерпаздары концерттік бағдарлама ұсынды.
Тамыз конференциясы ұстаздар қауымына жаңа серпін сыйлап, білім саласының даму бағытын айқындады. Білім – аудан дамуының басты тірегі. Ұстаздар, ата-аналар және билік өкілдерінің бірлескен еңбегімен аудан алдағы уақытта да жаңа жетістіктерге жететініне сенім мол.
Ш.ДОСКЕЕВА,
«Жаңа уақыт»
