Алматыда математика, физика және информатика (IZhO) пәндері бойынша Жәутіков атындағы ХХ халықаралық олимпиаданың жабылу салтанаты өтті. Биыл бұл олимпиадаға әлемнің 15 елінен 85 команда, 650-ден астам мектеп оқушылары, 400-ге жуық физика, математика, информатика пәні мұғалімдері қатысты.
Олимпиадаға қатысушыларды Қазақстан Республикасының Оқу-ағарту министрі Ғани Бейсембаев, «РФММ» КЕАҚ Директорлар кеңесінің төрағасы Берік Қаниев және Алматы қаласы әкімінің орынбасары Әсем Нүсіпова құттықтады.
«Бүгін – бүкіл отандық білім үшін айтулы оқиға. 20 жылдан бері көрнекті ғалым-математик, академик Орымбек Жәутіковтың арқасында жыл сайын күллі әлем таныған дарынды математиктердің тұтас буыны қалыптасып келеді. Жәутіков атындағы халықаралық олимпиада жүздеген талантты оқушыны жинап, білім бәсекесінің алаңына айналды, қазақ мәдениеті мен дәстүрлерін әлемге танытуға жол ашты. Қатысушылардың әрқайсысы математика және физика сияқты іргелі ғылымдар бойынша лайықты нәтижелер көрсетті және бүгін әлемдік аренада өз елінің туын мақтанышпен көтерді», – деді министр.
Олимпиадаға қатысу – өз күшіңізді сынау мүмкіндігі. Ол алға қарай дамуға, көбірек танып-білуге ынталандырады. Балалардың қабілет-қарымын ашуға, қызығушылықтарын анықтауға және мектеп пәндерін тереңірек меңгеруге мүмкіндік береді. Әдетте, олимпиадалардағы тапсырмалар қосымша дайындықты және берілген тапсырмаларды орындауда стандартты емес тәсілдерді қолдануды қажет етеді.
Олимпиаданың мақсаты – дарынды оқушыларды анықтау, оларды интеллектуалдық тұрғыда одан әрі дамыту және кәсіби бағдарлау үшін жағдай жасау, оқушылар арасында физика, математика және IT білімдерін тарату және насихаттау, сондай-ақ, басқа елдердің физика-математикалық мектептерімен халықаралық ынтымақтастықты дамыту.
Зияткерлік сайыс республикалық физика-математика мектебінде оқушылар арасында теориялық және эксперименттік екі кезеңде, мұғалімдер арасында бір кезеңде өтті. Қатысушылар математика мен информатикадан есептер шешті, сондай-ақ физикадан эксперименттер жасады.
Абай облысынан екі мұғалім, 6 оқушы олимпиадада бақ сынады. Үшінші орынға Семей қаласындағы «БІЛІМ-ИННОВАЦИЯ» лицейінің физика пәні мұғалімі (ұстаздар арасында) Жасқайрат Нәубетов пен «БІЛІМ-ИННОВАЦИЯ» лицейінің 9-сынып оқушысы Алем Аменов иеленді.
Бородулиха ауданының оқушысы Адильхан Ержанов ауыл мектептері арасында «Үздік көрсеткіш» атағын жеңіп алды.
Естеріңізге сала кетейік, үш жыл онлайн форматында өткен олимпиада биыл алғаш рет оффлайн форматта өткізілді. Халықаралық Жәутіков олимпиадасы ҚР Оқу-ағарту министрлігінің бастамасымен 2005 жылдан бері өткізіліп келеді. Мақсаты – оқушылар арасында физика-математика ғылымын насихаттау, халықаралық ынтымақтастықты дамыту, түрлі елдердегі мамандандырылған мектептер арасында достық қарым-қатынас орнату, тәжірибе алмасу, Қазақстанның білім мен мәдениет деңгейін таныту.
Жәутіков атындағы ХХ халықаралық олимпиада Қазақстан, Әзербайжан, Армения, Беларусь, Ресей, Қырғызстан, Өзбекстан, Болгария, Тәжікстан, Түркіменстан, Моңғолия, Грузия, Сербия, Түркия, Нигерия сынды елдерден жиналған қатысушылардың басын қосты.
Қазақстандық оқушылар 109 медаль, 10 алтын, 43 күміс және 56 қола жеңіп алды.
Гран-приді жеңіп алған команданың барлық мүшесіне кубок пен ноутбуктер табысталды. Барлық жүлдегер дипломдармен және бағалы сыйлықтармен марапатталды.
Сұлтан Ибрагимов