Дүниежүзілік еңбекті қорғау күніне орай білім беру қызметкерлері арасында жыл сайынғы кәсіподақ спартакиадасы өтті. Жарыс волейбол, үстел теннисі және тоғызқұмалақ сынды спорттың үш түрінен өтті.
Шараның мақсаты салауатты өмір салтын насихаттау, спорттың дамуына үлес қосу.
Екі кезең бойынша ұйымдастырылған жарысқа ауданның 9 мектебі қатысты. Қорытындысы бойынша волейболдан 1 орынды Ә.Бөкейхан атындағы қазақ орта мектебі командасы жеңіп алса, екінші орынды Новопокровка орта мектебі, 3 орынды Жезкент кентінің мектеп-лицейі иеленді. Ә.Бөкейхан атындағы қазақ орта мектебінің қатысушысы М.Қажымұханов «Үздік шабуылшы» атанса, Новопокровка орта мектебінің қатысушысы Ю.Большакова «Үздік байланыстырушы» атанды. Ал Жезкент кентінің мектеп-лицейінің қатысушысы Д.Егимбеков «Үздік қорғаушы» номинациясын жеңіп алды.
Үстел теннисінен әйелдер арасында Ә.Бөкейхан атындағы қазақ орта мектебінің қатысушысы Ж.Қалибекова бірінші орынды жеңіп алса, Переменовка орта мектебінің намысын қорғаған С.Сайбаева екінші орынға тұрақтады. М.Әуезов атындағы орта мектеп қатысушысы Г.Нұртазина үздік үштікті қорытындылады.
Ерлер арасындағы тартысты бәсекеде Жезкент кентінің мектеп-лицейінің абыройын қорғаған А.Козловтан ұпай санын асырған спортшы болмады. Жерновка орта мектебінің қатысушысы М.Алекпаев 2-орын алса, Ә.Бөкейхан атындағы қазақ орта мектебінің қатысушысы А.Рымбек үшінші орын алды.
Ұлттық ойын тоғызқұмалақтан әйелдер арасында Переменовка орта мектебінің қатысушысы Ж.Сепқазиева 1-орын, В.Комаров атындағы орта мектебінің қатысушысы Г.Мұратбекова 2-орын, М. Әуезов атындағы орта мектебінің қатысушысы С.Слямгалиева 3 орын алды.
Ерлер арасында М. Әуезов атындағы орта мектебінің қатысушысы Б.Камитеев 1-орын алса, Переменовка орта мектебінің қатысушысы К.Бектұров 2 орын, В.Комаров атындағы орта мектебінің қатысушысы Ш.Тоқашев 3-ші орын алды.
Барлық командалар аудандық білім беру кәсіподағының дипломдарымен және медальдарымен марапатталды. Кәсіподақ спартакиадасының ауыспалы кубогы Ә.Бөкейхан атындағы қазақ орта мектебі командасына бұйырды.
К. Даумбаева
Аудандық кәсіподақ комитетінің төрағасы,
С. Алексеева
білім бөлімінің әдіскері