Халықаралық балаларды қорғау күніне орай Бородулиха ауылындағы Жеңіс саябағында аудандық XV «Айналайын» балалар шығармашылығы фестивалі өтті.
Биыл фестивальдің ұйымдастырылғанына 15 жыл толып отыр. Жыл сайын дәстүрлі түрде өтетін бұл шара ауданымызда бала талантын шыңдайтын, дарындыларға шабыт сыйлайтын алаңға айналған.
Осы жылы фестиваль ұлы ойшыл, қазақтың дана перзенті Абай Құнанбайұлының 180 жылдығына арналды. Оның тәрбие, білім, адамгершілік туралы ойлары әлі де өз маңызын жоймаған рухани бағдар.
Шараны ұйымдастырған — Бородулиха аудандық Шығармашылық үйінің педагогтары мен әдіскерлері. Ауданның 18 мектебінен келген қатысушылар ән айтты, би биледі, өлең оқыды.
«Би» номинациясы бойынша гран-при Зубаир орта мектебі мен Т. Аманов атындағы орта мектептің шығармашылық ұжымдарына берілді. Олар өз өнерлерімен көрермендер көзайымына айналып, мереке көрігін қыздырды. «Вокал» жанры бойынша М. Әуезов атындағы мектептің оқушысы Асият Дүйсенова мен Абай атындағы орта мектептен Олеся Истомина әсем әндерімен әуеледі.
Өлең оқуда өзіндік ерекшелігімен дараланған Ы.Алтынсарин атындағы мектептің оқушысы Дмитрий Ковальчук «Көркемсөз оқу» номинациясы бойынша үздік деп танылды. Жеңімпаздарға қаржы сертификаттары мен Бородулиха ауданының әкімі Айдар Ибраевтың грамотасы табысталды.
Өзге жеңімпаздар мен қатысушыларға қаржы сертификаты, алғыс хаттар мен білім бөлімінің грамоталары табысталды.
Фестивальдің жоғары деңгейде өтуіне демеушілер де зор үлес қосты. Шараны ұйымдастырған шығармашылық үйі, ауылдық округ әкімдігі мен аудандық білім бөлімінің ұжымы демеушілік көрсеткен шаруа қожалықтарына және кәсіпкерлерге алғыстарын білдірді. Демеушіледің қолдауымен балаларға тәттілер таратылып, сый-сыяпат жасалды.
«Айналайын» — өскелең ұрпақтың мәдени өміріндегі ерекше фестиваль. Жас өнерпаздардың талантын ашуға үлес қосып келе жатқан шараның жыл санап мәні мен мазмұны артып келеді.
Ай-Көркем МАҚЫШ,
«Жаңа уақыт»