Жыл сайын Астанада қазақ елінің әр аймағының ауыл шаруашылығы жәрмеңкесін өткізу дәстүрге айналған. Бұл жолы елордада кезекті жәрмеңке 7-8 қазан күндері өтті. Игілікті іс-шарадан біздің жерлестеріміз де қалыс қалған жоқ. Жәрмеңкенің негізгі мақсаты – ауылшаруашылығы тауарларын өндірушілерге өз өнімдерін сатуға көмектесу. Арзан бағамен халыққа тиімді қызмет көрсету үшін ұйымдастырылатын ауылшаруашылығы жәрмеңкесі халықтың барлық тобының сатып алу қабілетін ынталандыруға бағытталған.
Астана қаласының тұрғындары жеке кәсіпкерлер мен ауыл шаруашылығы өндірушілерінен тікелей әрі төмен бағамен сапалы және сертификатталған тауарды сатып алуға мүмкіндік алады.
Аудан әкімінің орынбасары Ерлан Жұмабаевтың жетекшілігімен ұйымдастырылған арнайы басқосуда ауылшаруашылығы ауданы саналатын Бородулиха өңірі дихандарының елордада өтетін Абай облысының ауылшаруашылығы өнімдерінің жәрмеңкесіне қатысуы пысықталды, осыған орай, жерлестеріміз елордадағы Абай облысының ауылшаруашылығы өнімдерінің жәрмеңкесіне қызу дайындыққа кірісіп кетті.
Жәрмеңкеге «Е. Зайтенов» шаруа қожалығы 0,3 тонна шұжық, 0,3 тонна ірімшік, 0,2 тонна сары май өнімдерін, «Айжан +» шаруа қожалығы 2 тонна күнбағыс майын апарды. «Часовников С.В.», «Золочевский, «Серебрянский И.В.», «Бычковский», «Безземельный», «Дурманов» жеке кәсіпкерлерінің 0,6 тоннадан асатын бал өнімдері де өз сатып алушысын тапты.
«Былина» шаруа қожалығы жәрмеңкеге 1 тонна ет өнімін апарды. Тұтынушылар еш қоспасыз, таза экологиялық өнім саналатын Бородулиха балына жоғары баға берді. Жәрмеңкеде ауданымыздың әр өңірінен келген диқандар өз өнімдерін арзан бағада сатты.
– 7-8 қазан күндері жерлестеріміздің Астанада өткізген жәрмеңкесінде саудаланған тауарлар өзінің төменгі бағасымен ғана емес, экологиялық жағынан таза өнім болуымен астаналықтардың көңілінен шықты.
Осы игілікті іске үлесін қосқан «Е.Зайтенов», «Айжан+», «Былина» сынды шаруа қожалықтардың басшыларына және «Часовников С.В.», «Золочевский», «Серебрянский И.В.», «Бычковский», «Безземельный», «Дурманов» сынды жеке кәсіпкерлерге алғысымыз зор, – дейді аудан әкімінің орынбасары Ерлан Жұмабайұлы.
Жәрмеңкеге қатысқан ауылшаруашылығы құрылымдары өкілдерінің айтуынша, мұндай шараларды өткізу тауар өндірушіге де, тұтынушығы да өте тиімді. Бұл – ең алдымен, өзімізде өндірілген отандық әрі сапалы өнімді өткізудің ұтымды жолы. Жалпы, жәрмеңке өткізу экономикалық тұрғыдан тиімділігін арттырып келеді, – дейді аудандық ауылшаруашылығы бөлімінің мамандары.
Азамат Смагулов
