Абай облысы, Бородулиха ауылындағы Әлихан Бөкейхан атындағы қазақ орта мектебі бір кездері қарапайым үлгідегі білім ордасы болатын. Алайда «Қазақстан халқына» қорының қолдауымен бұл мектептің оқушылары үшін жаңа мүмкіндіктер ашылды.
Мектеп директоры Балғын Бекетайдың айтуынша, ауылда ұзақ жылдар бойы қазақ мектебі болмаған. Тек ауылда ғана емес, көрші елді мекендерде де мемлекеттік тілде білім алғысы келетін балалар аз болмаған. Қазақ мектебі ашылғаннан кейін «Қазақстан халқына» қоры мен Назарбаев зияткерлік мектебі қолдау көрсетіп, білім ордасының дамуына серпін берген.
Қордың қолдауымен мектепте заманауи, барлық стандарттарға сай жаңа кабинеттер жабдықталды. Мұнда басты назар тек білім сапасына ғана емес, оқу процесін оқушылардың қабілеті мен сұранысына бейімдеуге де аударылады.
– «Бізде қажетті құрал-жабдықпен қамтылған кабинеттер ашылды. Мәселен, еңбек сабақтарында ұлдар да, қыздар да болашақ өміріне қажет дағдыларды меңгеріп жүр. Ұлдар ағаш өңдеу техникасын, станоктарда жұмыс істеуді, құралдарды қолдануды үйренсе, қыздар қолөнермен айналысып, үй шаруашылығының негіздерін меңгеруде. Балалар түрлі креативті идеяларын ұсынады», – деп атап өтті Балғын Бекетай.
Сонымен қатар мектепте телестудия, робототехника және STEM кабинеттері ашылған. Оқушылар сурет салып, саздан мүсін жасап, шығармашылық қабілеттерін шыңдауға мүмкіндік алды. Кітапханада тек кітап оқу ғана емес, мәтіндермен түрлі ойын түрінде жұмыс істеу тәсілі енгізілген.
– «Балалар өз жобаларымен айналысады: бірі суретке қызықса, енді бірі робототехникаға ден қояды. Студияда өздері контент түсіріп, әлеуметтік желі жүргізеді. Ал кітапханада оқылған мәтінге сәйкес лабиринт құрастыру секілді әдістер қолданылады. Бұл тәсіл оқушылардың есте сақтау қабілетін күшейтіп, терең ойлауға үйретеді», – деді мектеп директоры.
«Қазақстан халқына» қоры ауыл мектептерін қолдауды жалғастырып, өңірлердегі қала мен ауыл арасындағы білім беру алшақтығын азайтуды көздейді.
Шайза АСАНҚЫЗЫ,
«Жаңа уақыт»
