Семей қаласында Абай облысының ауыл шаруашылығы және қайта өңдеу өнеркәсібі қызметкерлерінің күні кең ауқымда аталып өтті. Абай атындағы кітапханада ұйымдастырылған дәстүрлі «Алтын күз» салтанатты жиыны өңірдің аграрлық саласында жоғары нәтижелерге қол жеткізіп жүрген еңбек озаттарын ұлықтауға арналды.
Мерекелік рәсімде Бородулиха ауданының еңбеккерлері де лайықты құрметке бөленді. «Жасмин» шаруа қожалығының басшысы Евгений Жбратов ауыл шаруашылығы саласындағы үздік еңбегі үшін III дәрежелі «Еңбек Даңқы» орденімен марапатталды. Бұл марапат – шаруашылық басшысының көпжылдық еңбегі мен өндіріс тиімділігін арттырудағы табандылығының айқын дәлелі.
Сондай-ақ «Рассвет» шаруа қожалығының қызметкері Олег Остапенко «Үздік фермер» номинациясы бойынша қызметтік автокөліктің кілтін иеленіп, ауданның абыройын асырды. Бұл жеңіс оның ауыл шаруашылығы саласындағы үздік көрсеткіштері мен кәсіби шеберлігінің мойындалуы болып табылады.
Өңір агроөнеркәсібін дамытуға елеулі үлес қосып жүрген «Жұмаш» ЖШС директоры Серғазы Әлменев облыс әкімінің Алғыс хатымен марапатталды. Оның шаруашылықты тиімді басқаруы, жаңа технологияларды енгізуі және ауыл тұрғындарын тұрақты жұмыспен қамтамасыз етудегі еңбегі ерекше бағаланды.
Ауыл шаруашылығы – Бородулиха ауданының ғана емес, тұтас Абай облысының экономикалық дамуының негізгі тірегі. Дала төсінде маңдай терімен еңбек етіп жүрген шаруалар өңірдің азық-түлік қауіпсіздігін қамтамасыз етіп, облыс экономикасының тұрақтылығына елеулі үлес қосып отыр.
Сондықтан «Алтын күз» мерекесінде табысталған марапаттар – еңбек адамдарына көрсетілген зор құрметтің, олардың үздіксіз еңбегі мен жетістіктерінің лайықты бағасы.
Бородулиха ауданы жыл сайын аграрлық салада тұрақты өсім көрсетіп, облыс дамуына қомақты үлес қосып келе жатқан қажырлы еңбеккерлерімен мақтанады.